Durante e Congreso Teacher Care tambe a enfoca riba ‘Regulacion di Emocion’

Ortopedagogo Samantha Oduber splica:

 ORANJESTAD (AAN)-- Ortopedagogo Samantha Oduber, di Bureau Centro Multidisciplinario Aruba, (MDC) tambe a participa den e Congreso “Teacher Care”, organiza pa Fundacion Autismo Aruba, diaranzon 14 di October awo.

   “Regulacion di Emocion” hopi enfoca riba muchanan cu Autismo, den edad di chikito te cu seis aña, ta un di e temanan cu a wordo trata.

   Esaki ta con ta reconoce, por ehemplo, ora cu un mucha ta contento, rabia of frustra, y nan a duna tips, con e maestro por actua den cierto situacionnan ey, y con e por haci pa preveni un explosion di emocion, of “meltdown”.

   E guia aki ta pa tanto e maestro como e mucha cu tin Autismo. “Pasobra nos a duna tips na esnan cu ta traha cu e muchanan aki, pero si bo tin un persona cu sa con pa anda cu e dificultadnan cu e mucha ta pasa door di dje na momento cu e ta ‘desregula’ y e ta yuda e mucha mes tambe despues, cu e por wordo miho comprendi, of con e manera di anda cu ne, ta diferente”, Samantha a indica.

El a agrega cu compara cu añanan prome, aworaki e manera pa deal cu Autismo, e profesionalnan ta mas conciente con e mucha y e otro persona ta tuma e situacion, kico e sentimentonan ta, y purba di reacciona na un manera mas sensible cu e muchanan, y tin mas comprension pa locual nan ta sinti na e momento eynan.

   “Den nos Centro, nos ta traha cu muchanan chikito te cu 18 aña pero e grupo meta ta muchanan cu ta bay kleuter y scol basico”, Samantha Oduber a señala. Aunke e no tin cifranan, si t’asina cu tin hopi mucha cu Autismo, y e Centro ta haya melding di hopi scol.

   “Nos no ta traha solamente cu e area di comportacion, pero tambe didactico. Pues, ta un combinacion e ora ey, locual nos ta haci na e MDC”, Oduber a agrega.

   Finalmente, el a relata cu na mayornan nan ta duna guia largo, pero si nan ta duna conseho y na MDC nan tin ondersteuner cu por duna sosten na mayor y cu tambe ta bay cas pa yuda nan den situacion unda mas tanto e comportacion ta bin dilanti.