Congreso pa Educador exitoso a pone enfasis riba orientacion y sosten den enseñansa

Carolina Thiel-Span di Fundacion Autismo Aruba:

ORANJESTAD (AAN): Duna e miho guia na un mucha ta cuminsa cu educadornan cu ta bon informa y cu sa unda nan por acudi pa sosten. Cu e enfoke aki, Fundacion Autismo Aruba (FAA), den colaboracion cu diferente fundacion, organizacion y departamento, a organiza e Congreso pa Educador, brindando docentenan di diferente scol informacion y orientacion pa nan trabao diario.

   Carolina Thiel-Span di FAA a splica cu un di e metanan principal di e congreso tabata pa educadornan, principalmente esunnan cu ta traha cu muchanan di 0 pa 6 aña, sa unda nan por busca ayudo ora nan ta sinti cu e exigencianan di nan trabao ta bira demasiado.

   E sosten aki ta inclui tanto orientacion pa duna les como ayudo psicologico pa enfrenta y maneha periodonan dificil. Ademas, e congreso a pone atencion na con educadornan por orienta mayornan y coleganan tocante e posibilidadnan di ayudo disponibel pa nan studiantenan.

   E mensahe central ta cu educadornan tambe mester sosten pa por sigui sostene otro. Door di sa unda acudi y con pa busca ayudo na tempo, nan por atende miho na nan propio bienestar y na e necesidadnan di e muchanan bao nan cuido.