Dunando honor na poeta Clarette Quandus

ORANJESTAD (AAN): Na Biblioteca Nacional a celebra cu e poeta Arubiano Clarette Quandus a cumpli 25 aña ta publica obranan literario y 44 aniversario den e mundo creativo, artistico y di literatura di Aruba.  

Pa Minister Maduro di Cultura tabata un placer pa tabata presente pa asina disfruta di e diferente presentacionnan cu tabata tin na honor di e celebracion aki.  Minister Maduro a hiba palabra repasando e bida artistico di Clarette kende a cuminsa skirbi versjes cu su 8 aña di edad. E tempo ta su juffrouw Joanna Trimon di Colegio Ora Ubao a duna Clarette e oportunidad pa recita un poesia, specialmente dedica na mamanan riba ‘Dia di Mama’ e tempo ey.

   Aki ta caminda cu Clarette a worde inspira pa skirbi y di eynan e resto ta historia. Awendia Aruba por conta cu un poeta cu semper a carga nos idioma Papiamento y a sa di compone hopi poesia for di cual 4 buki a sali publica riba mercado.

   Durante e atardi aki, Minister Maduro, den nomber di Gobierno di Aruba, a entrega na Clarette un reconocemento pa su añanan dedica na e mundo creativo, artistico y di literatura.