ORANJESTAD (AAN): Aruba Flight Simulator Club ta presenta un anochi informativo pa tur amante di aviacion y muy specialmente pa tur esnan cu ta interesa den e hobby di Flight Simulator.
Esaki ta tuma lugar dialuna 25 di September venidero di 7’or pa 9’or di anochi na Centro di Bario Lago Heights. Durante e anochi aki lo tin diferente topico interesante, entre otro bulamento online, informacion di e club, experiencia di miembronan y hopi mas.
Loke ta Flight Simulator: Esaki ta basicamente un wega caminda bo por practica bula avion riba un computer, cual ta wordo usa pa piloto y controladornan aereo. Por medio di internet ta possible pa topa otro online y bula hunto virtualmente. Esaki ta encera cu ta simula operacion aereo virtualmente unda tin comunicacion entre pilotonan y controladornan aereo y tambe por mira otro avionnan den cercania.
Na aña 2005 e prome reunion di Flight Simulator a wordo teni na Aruba, unda a bin nota cu tin hopi interes pa cu esaki. Aruba Flight Simulator Club a wordo funda 24 februari 2006 pa stimula, educa y purba trece interesadonan serca otro. Bo ta interesa den Flight Simulator y aviacion en general? Bo lo kier bira miembro y forma parti di nos Club? Wel, ata bo chens ki. Join nan dia 25 di September 2023 di 7or pa 9or di anochi na Centro di Bario Lago Heights.
