Magay Brito, Secretario General SEPPA:
ORANJESTAD (AAN) Cada bez e empleadonan di Arubus ta wordo bisa cu no tin placa pa cumpli cu nan demandanan, cual lucha Sindicato SEPPA ta sostene, cada rato nan ta wordo manda di cashi pa muraya, y e trahadornan no ta dispuesto na sigui acepta esaki. Asina Magaly Brito, Secretario General di SEPPA ta reitera den entrevista cu Matutino DIARIO.
“Pa locual nos a conta di aña pasa, si nan lo a pone sikiera mitad miyon florin pa e trahadornan, nos lo por a yega na un acuerdo. Si bo compara e suma aki cu presupuesto di Pais Aruba, e ta nada! Y di otro banda e minister awo ni esey e kier pone, pasobra ta e minister anterior mester a haci’e, y no a fix’e.
Pero esaki ta cosnan politico cu Gobernantenan mester stop di haci pasobra na final e trahadornan aki tin nada di haber cu e minister anterior mester a pon’e y e no a pon’e. Ora bo a bin, pon’e abo; ni esey tampoco bo kier haci”, señora Magaly Brito ta cuestiona.
