Minister di Transporte Ursell Arends:
*Un di su prioridadnan ta un Hurista
ORANJESTAD (AAN) – Minister di Transporte, Ursell Arends a indica den entrevista cu DIARIO, cu DTP (Transporte Publico), ta un departamento cu su plan di formacion ta consisti di 50 funcion, y e ta opera cu un total di 27 persona.
Eynan caba por mira cu nan mester di mas personal pa nan por atende cu tur e permisonan cu tin. DTP tin un total di 7785 vergunning otorga, pues e control cu nan ta hiba mester ta un control riguroso, pero si no tin e personal no por hiba e control aki.
“Nos ta bay cuminza pa ubica algun di e personal necesario na DTP, y mi ta spera cu un bez cu e kerntakenanalyse cu ta bay conduci aworaki door di DRH y tambe cu un compania di Hulanda, cu lo bay trece claridad tambe con nos lo bay sigui empodera y duna e departamento aki e capital humano pa hiba un control riguroso, pa asina aki cumplimento di ley ta algo cu nos tur lo kier mira, y mi ta kere nos mester di e personal pa controla esnan cu no ta cumpliendo cu ley”, segun e mandatario.
“ Un di e cosnan cu e departamento aki ta boga pe pa añanan, y ban spera cu nan por logra, ta cu nan kier tin un Hurista eynan. Esey tambe ta algo importante pa nan y nos lo purba pa prome cu e fin di aña aki, nan tin e personal cu nan ta desea, of esnan cu nan ta señala cu ta un prioridad aworaki cu nos por tin nan in place”, Minister Ursell Arends a señala.
