ORANJESTAD (AAN): Partido AVP e siman aki a mustra preocupacion cu aumento dramatico di schoolgeld na practicamente tur scol na Aruba.
Segun nan, esaki ta bin directamente na falta di subsidio debido di parti di Gabinete Wever-Croes di “bijzondere onderwijsinstellingen”, manera SKOA. Pero tambe hasta scolnan publico y EPB ta haya nan forza pa aumenta schoolgeld pa motibo di falta di sosten di gobierno.
AVP ta convenci cu e falta di sosten financiero di Gobierno na institutonan cu ta percura pa eneñanza na Aruba ta conduci na e aumentonan practicamente impagabel pa miles di famia na Aruba.
E aumentonan dramatico aki ta afecta famianan di 6.000 alumno di scolnan basico, 2.500 alumno di MAVO y 1.500 mucha cu ta sigui “kleuteronderwijs” na schoolnan di SKOA. E ta kibra bo curason pa mira con miles di famia nan Aruba ta worde confronta cu aumentonan enorme di schoolgeld, pasobra Gobierno tin otro prioridad cu fondonan di Pais Aruba. Asina ta fractura completamente e presupuesto di e hogarnan di miles di famia. Tambe 1.500 famia cu yiunan na EPB na San Nicolas y na Hato ta worde confronta cu aumentonan di schoolgeld dramatico riba 100%.
