Drummer Taylor Hawkins di Foo Fighters a ser haya morto na Bogota

Algun ora prome cu concierto

BOGOTA: E grupo Foo Fighters tabata preparando nan mes pa presenta Diabierna anochi den Festival Estereo Picnic na Bogota, ora cu diripiente a ripara cu nan drummer Taylor Hawkins no a sali for di su camber di hotel.  Ora cu a bay check su camber, a bin haye eyden casi sin signo di bida.  A core bati alarma, bisando cu tin un ‘pashent cu dolor na su pecho’.  Paramediconan a yega y mesora a cuminza practica CPR den su camber mes, pero algun minuut despues a nota cu ya e curazon no ta reacciona mas, y a declara su morto.

   Detective- y personal Forensico di Polis na Bogota e ora a encarga nan mes pa cuminza cu e investigacion.  E empresario cu a organiza e concierto, a haye obliga na informa publico cu Foo Fighters lo no ta presentando mas e anochi, y no a divulga e motibo.

   Pero despues ta tur hende a haya sa cu el a fayece den camber di sun Hotel na parti panort di Bogota, y miles di fanatico a mobiliza pa e Hotel unda nan a keda mantene un vigilia parti pafo.

   Fiscal General di Colombia a duna ordo pa confisca e cadaver pa asina practica autopsia, y haya sa e motibo pakico esaki a socede.  Taylor Hawkins di 50 aña di edad, tabata forma parti di Foo Fighters desde 1997 ora el a wordo contrata pa e cantante principal y ex-drummer di Nirvana, Dave Grohl.

   “E famia Foo Fighters ta devasta pa e perdida tragico y prematuro di nos tan keri Taylor Hawkins,” e grupo a skirbi riba Twitter.  “Su espirito musical y su hari contagioso lo biba cu nos pa semper,” nan a agrega.

   Ta conoci cu e drummer Hawkins na aña 2001 a yega di bay den coma debi na un overdosis di heroina.  E musico despues a keda bisa tur hende, cu for di e tempo ey e ta “limpi” y no ta usando droga mas.

   Sinembargo Hawkins lo tin un secreto scondi cu ningun hende sa di dje! Diasabra atardi, Fiscal General a indica cu den test toxicologo haci riba su urina, nan a haya 10 tipo di droga den curpa di e drummer, incluyendo THC (marihuana), tricyclico pa anti-depresion, benzodiacepina, y opioids tambe.

   Cu esaki, e Instituto Nacional di Medicina Legal lo sigui cu investigacion pa haya sa kico exacto a causa morto di Taylor Hawkins.

   Hawkins ta casa cu e ilustradora Alison Hawkins, kende ta mama di su tres yiunan.