ORANJESTAD (AAN): Sra. Caroline Hart, directora di Respaldo, hunto cu psikiatra Nathalie Kingsale y dr. Rosanna van Dijk di e Hunta di Supervision di Respaldo,
a representa e fundacion cerca e formadornan caminda a trece dilanti e importancia di un salud mental accesibel y sostenibel pa tur hende na Aruba. Esey ta loke Respaldo a duna di conoce riba nan rednan social.
Durante e reunion nan a pone enfoke riba e siguiente puntonan: (*) Un tereno pa un edificio nobo. (*) Respaldo mester un clinica nobo y moderno pa cumpli cu e demanda actual. Un localidad nobo ta necesario pa sigui brinda e cuido psikiatrico di calidad cu e pueblo di Aruba merece. (*) Mihor salario y condicionnan laboral pa e personal di cuido. (*) Respaldo tin hopi dificultad pa recruta y retene profesionalnan di cuido na Aruba. (*) Mas sosten pa e detenido y leynan nobo. E sistema actual mester di innovacion pa por duna un cuido mas efectivo. (*) Un solucion pa turistanan sin seguro y persona indocumenta – Gastonan pa e grupo aki ta sigui subi y mester un miho structura pa resolve e problema. (*) Mihor servicio di instancianan gubernamental – Proceso administrativo pa empleadonan stranhero mester ta mas liher pa por garantisa un bon operacion di e sistema di salud mental.
