Dr. Tiana Melina Leon a gradua Medico General como ‘Magda Cum Laude’

Estudio di seis aña y el a regresa su isla

ORANJESTAD (AAN): Recientemente un cantidad di famia y amigo tabata presente na Arrival Hall di Aeropuerto Internacional Reina Beatrix pa asina duna bon bini na un un studiante cu ta regresando su isla, finalizando su estudio den exterior.

   Cu blaas den man y grito di alegria, famianan incluyendo su mama Marieta Vingal a bira feliz ora cu e dama hoben Tiana Melina Leon a sali di e portanan.  Esaki debi cu el a caba di gradua como Doctor na Universidad Catolica Nordestana (UCNE) situa na San Francisco de Macoris na Republica Dominicana.

   El a gradua Magna Cum Laude, cu ta algo di admira y sigur elogia.

   DIARIO a topa cune net ora cu el a caba di regresa Aruba na Aeropuerto, cu un recepcion caluroso di famia y amigonan.

   Dr. Tiana Leon a splica cu despues di a sigui Universidad pa 6 aña largo, el a caba su carera cu ta “Medico General”, y a regresa e isla pa traha un tempo.  Despues e lo bolbe bay den exterior pa sigui pa su Specializacion.

   Ora cu el a cuminza su estudio, e plan tabata pa el a gradua na September 2021, sinembargo esaki a cambia completamente ora cu e Pandemia a afecta henter mundo na Maart 2020.  E pandemia a pone esaki sufri un retrazo di 6 luna.

   Segun Dr. Tiana Leon, e pandemia tambe a strobe di su plan pa bay Spaña pa haci su specializacion.  Pero esey tambe pa awor a cay atras.

   Bon mes cu durante e crisis di Covid-19, cu personalmente cosnan a cana netchi.  El a indica na DIARIO cu el a bay hasta core su periodo di stage na diferente Hospital na Republica Dominicana, y a haci esey durante e periodo di Covid-19.  “Y toch mi a logra,” Dr. Tiana Leon a bisa.

   Pa awor e ta bin Aruba, y lo bay traha prome mientras tanto cu e Praktijk POH di Wit Geke Kruis rond di e isla, y tambe e tin cu Hospital plannan pa bay haci un trabao, pero e tin di bay haci su BIG Registratie, y tambe e registro di AruBIG.

   E lo bay cuminza traha Diahuebs 7 April na Huispraktijk Dr. Wijngaarde na Paradera.

   DIARIO ta ofrece disculpa, cu pa motibonan logistico e relato aki a tarda un poco pa sali publica.