*E CV ta habri porta pa bo haya un entrevista di trabao
ORANJESTAD (AAN): Richenele Stamper di Departamento Progreso Laboral (DPL) ta splica riba e ayudo pa hendenan cu no ta haya trabao por tin un bon CV (Curriculum Vitae, curiculo, resume).
El a bisa cu DPL a bin cu un iniciativa mirando cu ta constata riba e mercado laboral cu mayoria hende cu ta bishita DPL hopi biaha no tin un CV actualisa of no tin un CV conforme standardnan moderno cu ta pisa awendia pa por haya un entrevista di trabao.
Segun Stamper, riba mercado laboral na e momentonan aki ta practicamente imposibel pa haya un trabao si bo no tin un CV den bo man of digitalmente.
Esaki ta pone cu hopi hende tin un barera pa nan por subi mercado laboral ya cu hopi oferta di trabao riba e rednan social ta solicita pa manda e CV via email y e ora nan ta considera pa bay wak si nan ta bay papia cu bo, a bisa.
Esaki ta significa cu sin un CV bo no ta yega na un entrevista laboral y consecuentemente mes bo no ta yega mes na e trabao.
E ta bay asina leu cu awendia e CV tin un structura nobo. Loke ta pisa y ta hopi importante den bo CV ta tanto bo experiencia di trabao, bo 'background', pero principalmente bo actitud (soft skills), cu ta e habilidadnan di traha cu hende, comunica bon, ta representabel, responsabel, etc.
Mayoria dunador di trabao ta opta pa duna trabao un hende cu si ta cumpli cu e partinan ey mas lihe cu un hende cu tin te hasta mas papel (mas estudio).
Esaki ta un di e motibonan pakico DPL a pensa pa bay yuda tur nan clientenan cu trahamento di un CV.
Mester corda cu si e CV no ta bon hinca den otro, no ta cumpli cu e standardnan, falta informacion, ta laga hopi duda of pregunta cerca e dunador di trabao, hopi biaha e no ta bay yama mes pa un entrevista. E dunador di trabao lo yama pa un entrevista esnan cu a manda e CV mas atractivo y cu si ta cumpli.
"Si bo CV ta un bon, moderno, atractivo, e tin tur informacion cu e dunador di trabao ta pidi y e kier wak, e ora bo ta cay den e grupo ey cu nan ta bay yama mas sigur mas sigur pa un entrevista. E CV ta habri porta pa bo haya un entrevista di trabao", Richenel Stamper a remarca.
