Dia 2 y 3 di juni den Curaҫao Festival Center:
ORANJESTAD (AAN)/WILLEMSTAD: E weekend di 2 y 3 di juni ta premira di bira uno grandi na Corsou cu e prome edicion di Caribbean Sun Splash Festival cu artistanan di renombre internacional den R&B, Hip Hop, Soul, Rap y AfroBeat.
Sun Splash ta priminti un escape musical cu lo segura di kibra tur espectativa cu un ‘line-up’ di 12 artista cu fama mundial incluyendo Ashanti, JaRule y e actual sensacion di momento Rema.
Ashanti, JaRule, Rema y 10 otro artista internacional mas...
Por confirma cu riba diabierna dia 2 di juni lo presenta dos head-liners cu ta e semper popular y sensual, ganador di un Grammy Award Ashanti y e multi-nominado pa Grammy Awards JaRule; cual hunto tin e cancion hit ‘Mesmerize’ cu te dia di awe ta wordo toca y scucha rond mundo. Mientras cu riba diasabra dia 3 di juni lo tin presentacion di e fenomenal artista di afro-beat di momento Rema.
Rema ta kibrando tur ‘musical charts’ cu su hit ‘Calm Down’ cu tin mas di 440 miyon views riba YouTube y creando mas di 4 miyon videos riba TikTok . Rema a sali debuta na 2019 cu su cancion ‘Dumebi’ pero tabata ‘Calm Down’ cu a pone e artista aki riba plataforma internacional combertiendo Rema, den e artista di momento.
E prome Caribbean Sun Splash Festival
Sun Splash Events NL ya bon conoci, ta un organisacion cu ta produci diferente festival Afro na Hulanda y ta forma ekipo cu un team local pa e biaha aki presenta su prome festival na Corsou. Despues di un fantastico concierto di Burna Boy na october di aña pasa e organisacion di Sun Splash mesora a cuminsa traha nan siguiente proyecto. Bishitantenan di e festival lo haña un experiencia sin igual den curacao Festival Center cu diferente area; entre nan un ‘foodcourt’, un area exclusivamente pa presentacion di DJnan internacional y naturalmente e area mas grandi, pa e conciertonan.
Sun Splash Events NL ta premira cu lo tin hopi bishitante for di exterior considerando e entusiasmo grandi pa e generonan musical aki; for di Aruba, St. Maarten, Surinam y te hasta Hulanda.
