Pa esnan cu tin malesa cu ta compromete nan salud
ORANJESTAD (AAN): Nos muchanan vulnerabel entre edad di 6 luna te cu 4 aña cu a nace cu malesanan hereditario of defectonan di nacemento, anteriormente no tabata por a worde proteha contra Covid.
Nos muchanan vulnerable tabata core e risico di keda contagia cu Covid na scol of cualkier caminda cu nan bay cu tur e consecuencianan pa nan. Hopi di e muchanan aki debi na nan condicion di salud asina comprometi mayornan tabata prefera di wantanan mas hopi posibel na cas pa minimalisa e risico pa keda contagia cu Covid.
Pa e muchanan aki y nan mayornan ta un alivio pa sa cu entrante awe 2 di mei 2023 tin un vacuna di Pfizer disponibel special pa mucha entre e edad ya menciona y bou condicionan specifico. Pa un mucha cu condicion di salud por ricibi e vacuna aki ta nesesario pa dokter specialista di mucha reseta esaki. Cu e reseta aki e mayor ta trece su yiu na Seccion di Malesanan Infeccioso di Departamento di Salud Publico situa na Avicennastraat #1 pa e mucha por ricibi su vacuna, ta trata aki di un serie di 3 vacuna.
Despues di e prome vacuna mester warda 4 siman pa haya di 2 vacuna y despues mester warda 8 siman pa di 3 vacuna. Ta hopi importante pa na momento cu e mucha ta bay ricibi e vacuna di Covid e mucha tin mas cu 2 siman cu e no a ricibi ningun otro vacuna y tambe despues di ricibi e vacuna di Covid mester warda 2 siman prome cu por ricibi cualkier otro vacuna. Pa muchanan entre edad di 5 cu 11 aña cu tambe ta sufri di un of otro condicion di salud cu a ricibi anteriormente vacuna caba, ta recomenda awo un booster shot.
Malesanan of condicionan di salud bou cual nos muchanan ta bin na remarke pa ricibi e vacuna di COVID ta e.o.: (*) Malesanan cardiovascular, (*) Malesanan di pulmon y di e sistema respiratorio, (*) Malesa di riñon, (*) Malesanan di stoma, tripa, higra y mas.
Pa mas informacion mayor por consulta cu specialista di mucha cerca ken e mucha ta worde controla of ta bou tratamento.
