DOW ta urgi sea Hotel of Restaurantnan stop di basha azeta sushi den tuberia di labaplato

Pesey tin holor stinki pabao di Bubali Plas y riba Boulevard

• E caso aki ta socede den area di Hotzone Palm Beach
• Diahuebs mainta ta registra hopi azeta sushi den riool 

ORANJESTAD (AAN): Dos luna pasa ya caba DIARIO a raporta di e situacion aki, unda cu awa di riolering ta keda pega dilanti Highrise Hotelnan, y e culpa ta cu un of mas negoshi den e area di Hotzone, intencionalmente of sin cu nan sa, ta bashando tur azeta y grease den nan labaplato, y kizas nan no tin ningun ‘greasetrap’ instala mes, pues tur esaki ta bay den e sistema di riolering.  Esaki ta causa desastre pa e area.  Awa sushi ta sali bin ariba y yena parti di Boulevard dilanti hotelnan cune.

   Pesey mes, DOW Aruba a indica cu nan ta tuma un posicion firme riba esnan cu ta basha tur tipo di vet, azeta, y grease den e sistema di riolering den e sector di Horeca na Aruba.  Pesey awor nan ta haci un yamada urgente pa sea Hotel, Mall, Bar, y Restaurantnan tuma medida y accion awor.

   DOW ta djis profundamente preocupa cu e incidentenan cu ta keda socede pa cu bashamento di vet, azeta usa, y grease (yama FOG Discharge) den e sistema di riolering a lo largo di Hotelnan Highrise na Irausquin Boulevard na Palm Beach, y tambe na Hotelnan Lowrise riba Irausquin Boulevard tambe.

   E bashamento di e productonan aki tin un impacto cu ta perhudica e proceso di tratamento biologico na e planta di RWZI na Bubali, y esaki ta ocasionando holornan desagradable den e area.  DOW ta urgi e Restaurant of Hotelnan cu ta responsable di e acto aki, pa nan stop inmediatamente.

   Den ultimo simannan, nan personal di vigilancia a bin nota un aumento significante di material FOG un biaha mas den area di Highrise na Palm Beach, specialmente riba tur Diahuebs mainta.

   Siman pasa so, nan a observa e casonan aki riba Diahuebs y Diabierna, cu a empeora aun mas e situacion.  E acumulacion di FOG den e sistema di riolering no ta djis afecta e eficiencia di e proceso di tratamento di awa sushi, sino tambe cu e ta trece riesgonan ambiental y di salud.

   Departamento di Obranan Publico ta reconoce e gravedad di e problema aki, y DIARIO a compronde cu nan ta tumando medida pa resolve esaki.  Nan ta colaborando estrechamente cu e partinan interesa pa aplica solucionnan inmediato.

   Ademas DOW ta mehorando nan protocolnan di vigilancia y strategianan di haci control, pa preveni casonan nobo di bolbe ripiti, y garantiza e cumplimento di e reglamentonan necesario.

   E bashamento den tuberia cu ta bay pa riolering di materialnan FOG, no ta djis afecta e funcionamento di e planta di tratamento di awa sushi na RWZI di Bubali Plas, sino tambe e ta impacta e bienestar general di comunidad y di turistanan.

   DOW ta urgi tur negoshi y individuonan cu ta operando den Sector di Horeca sea na Palm Beach of Eagle Beach, y tambe na Lowrise y Highrise Hotelnan, pa nan asumi nan responsabilidad y adopta e mihor practicanan den maneho di nan desperdicio di vet, azeta, y grease.

   Metodonan tin na cantidad pa yuda elimina esakinan, manera uso di ‘grease traps’, y servicionan autoriza pa colecta azeta sushi, ta esencial pa evita efectonan mahos riba e sistema di riolering y mantene un ambiente saludable pa e Arubiano y pa e turistanan.

   E bon noticia ta cu tin hopi Hotel na Palm Beach cu ta cumpliendo 100% cu e regla aki.  Dos luna pasa mes DIARIO a entrevista un gerente general di un Hotel Highrise, kende a mustra cu nan ‘grease trap’ ta funcionando perfectamente y ta wordo revisa y haci limpi.  Un bon regla ta cu cada compania tin di haci e grease trap limpi, unavez cu e tanki a yega 1/4 parti di su capacidad.  Y net e Hotelnan aki cu ta cumpliendo cu e regla, ta bin nota con awa sushi ta sali for di riolering (procedente di otro Hotel, Mall, of Restaurantnan) y ta acumula dilanti nan edificio.

   DIARIO a compronde di DOW, cu nan lo sigui vigila e situacion aki di cerca, y accionnan cu ta encera medidanan estricto lo wordo tuma pronto contra esnan cu ta keda viola esaki.

  Si acaso abo a descubri cu bo doño di trabao na bo restaurant of bar no ta worry cu nada, y ta basha tur azeta cu grease sushi manda abao, bo por yama DOW mesora na 528-4700 y duna e tip aki.