ORANJESTAD (AAN) – Felishah Ponson, di “Pedagogische Consulent” na Fundacion pa Nos Muchanan (FPNM),
den entrevista cu DIARIO a brinda algun informacion pa mayornan y conseho tocante e vacacion grandi, cu tey caba!
Na prome lugar Felishah a enfatiza riba vakantie kamp. El a señala cu ta conoci cu durante e periodo di vacacion hopi mayor tin cu sigui traha y mester busca un alternativa pa nan yiunan y esey ta “vakantie kamp”.
Esaki ta un bon opcion pa mayornan cu kier percura pa nan yiu(nan) pasa un dushi vacacion.
“Pues vakantie kamp ta un bon opcion pa manda bo yiunan e vacacion aki. Riba nos pagina di facebook, nos tin un album cu diferente campamento di vacacion cu ta wordo ofreci, na diferente lugar. Pues nos ta invita tur mayor cu ta interesa pa manda nan yiu na un di nan, pa bishita nos pagina di facebook y wak e diferente campamentonan di vacacion cu tin”, Ponson a comenta.
Algun di e puntonan pa tene cuenta cu nan, ora di scoge un campamento di vacacion, mayor tin cu wak e necesidad cu e tin kico e mester: E mester di un vakantie kamp di mitar dia, henter dia, un di un siman so, of un pa henter e temporada di vacacion?
Esaki ta importante pa e mayor pensa na dje, prome cu busca un campamento pa nan yiu(nan).
Tambe mester wak e posibilidad di e mayor su cartera. Ta conoci cu vakantie kamp ta birando bastante caro, anto ta importante pa evalua kico ta e mayor su presupuesto pa e vacacion aki, kico e por afford pa un vacacion adecua na su presupuesto y na e mayor su yiunan.
Otro aspecto cu ta importante tambe ta e necesidad di e yiunan. Ta importante pa puntra e muchanan kico nan ta interesa den dje. Kizas tin un meta cu e yiu kier logra, of e kier siña algo nobo anto e mayor por busca un vakantie kamp adecua p’e.
Tambe ta importante pa tene cuenta cu e interes di e yiu ta cambia tur aña segun e crece. “Pues kizas e vakantie kamp cu bo a mande aña pasa, no ta adecua p’e mas e aña aki. Kizas mester evalua su edad, su crecemento y su desaroyo, pa mande un vakantie kamp adecua pa su edad, crecemento y desaroyo”, Felishah Ponson a señala.
Ponson ta sugeri mayornan cu un bez cu el a haci tur e analisis menciona, yama e lugarnan cu el a scoge, pone tur su preguntanan riba papel y haci nan e ora ey. Por ehemplo, su nan ta ofrece cuminda of e mayor mes tin cu trece cuminda pa su yiu, si nan tin medio di transporte, of si nan tin prijs special pa rumannan, y kico ta e actividanan precies cu nan ta haci.
