DOW a firma pa CTC opera e Incinerator pasobra nan ta unico certifica pa haci esey

ORANJESTAD (AAN): Diahuebs atardi, director Marlon Croes di DOW den presencia di e.o. funcionarionan di Directie Wetgeving en Juridische Zaken y Departamento di Natuur en Milieu, a duna informacion di e Incinerator chikito cu tin na Parkietenbos.

   Segun Croes, ultimo simannan ta saliendo cierto informe den prensa cu ta duna diferente tipo di informacion, y e informacionnan aki no ta cuadra y no ta corecto.  Pesey a dicidi na tene e conferencia di prensa pa duna informacion na pueblo, con a yega asina leu y con e Incinerator ta hinca den otro.

   El a splica cu tabata na Juni 2020 cu DOW a tuma over e Incinerator Chikito y e proceso for di Serlimar.  Pa e simple motibo cu Serlimar e momento ey tabata den situacion financiero dificil y e ora ey no por a cumpli cu e contract cu nan tabatin cu CTC (Caribbean Trucking Company) cu ta e operador y supplier di e Dryer cu ta pertenece na e Incinerator.  E ora DOW a tuma e Incinerator over.

   “Si nos no a tume over, e lo a bira un inversion morto di par di miyon para sin cu e ta den uso,” Marlon Croes a bisa.  “Pa nos tambe tabata interesante como DOW pa nos tume over pa e simple motibo pasobra nos ta produci slip na nos plantanan di purificacion y nos tin cu elimina esaki, y e Incinerator ta un manera hopi mas limpi pa soluciona e problema di slip cu tin.”

   Ademas di slip, nan ta bay kima desperdicio medico y tambe cadaver di animalnan den dje.  Tur e componentenan aki (slip, medical waste y cadaver di animal) actualmente ta wordo kima den aire libre pafo.

   Ora cu DOW a tuma over, a tuma over tambe e contract di compra cu Serlimar tabatin cu CTC pa e Dryer.  DOW y Gobierno aki a inverti sumanan substancial pa por a finaliza cu instalacion di sprinkler, e continuous emission monitoring system, e sistema di alarma, y tur otro rekesito necesario pa por start e Incinerator aki.

   DOW pues a tuma e maneho di e Incinerator aki, pero pa su operacion a outsource e operacion di dje na CTC.  E motibo cu a haci esey ta debi cu CTC ta e supplier y representante di e fabricante Environ Ltd. na Inglatera cu a traha e Incinerator.  CTC ta unico compania na Aruba cu ta certifica e momento aki pa handle y opera e Incinerator.

   Den otro articulo, Croes lo mustra cu e suma mensual cu ta paga CTC no ta mes hopi cu algun hende ta mencionando e simannan aki.