Mas di 19 Kilo a keda confisca
- Nan tabata transporta droga via Drone
- Famia meti den e caso di droga
ORANJESTAD (AAN): E muhe Venezolano A.C.L.A. y su primo homber S.L.A., a wordo haya culpabel di posesion di droga mientras cu A.C.L.A. tambe ta culpabel di bendemento di droga. Esakinan ta relaciona cu pasamento di droga via Drone den KIA.
E acusacion cu Fiscal a presenta den Corte contra A.C.L.A. y S.L.A. ta cu entre 14 Juni 2024 y 21 November 2024, nan tabata meti den bendemento y posecion di marihuana.
Nenga di tabata bende droga: Hues a bisa cu for di investigacion di Polis ta sali na cla cu un preso den KIA, J., tabata haya droga via Drones. Tambe cu e pareha di J., esta A.C.L.A., lo tabata busca e droga y tambe S.L.A. Investigacion di Polis ta mustra cu A.C.L.A., S.L.A. y e mama di A.C.L.A., ta envolvi.
Hues a mustra cu A.C.L.A. a declara na Polis cu e tabata busca placa y droga riba instruccion di e preso J. Segun A.C.L.A., el a bisa Polis cu e tabata warda droga.
A.C.L.A. a bisa cu e ningun momento e declara asina. El a bisa cu Polis no a puntr’e asina. Hues tambe a bisa cu A.C.L.A. a declara cu J. a yega di maltrat’e den pasado y pesey el a sigui. A.C.L.A. a declara na Polis cu J. for den KIA tabata duna instruccion kico e mester haci cu e marihuana y kendenan mester cobra. Segun A.C.L.A. e unico cos cu Polis a puntr’e ta con el a yega na e droga y cu el a bisa cu ta J. a bis’e pa warda droga y cu e tabata busca placa cerca clientenan 1 of 2 vez pa siman. Segun A.C.L.A., el a bisa Polis cu e tabata bende paña y tabata bay cobra 1 pa 2 vez pa siman.
Mas di 19 kilo di droga confisca: Hues a mustra cu tin un lista cu e haya di e mama di A.C.L.A. di nombernan cu placa cu mester cobra. Segun A.C.L.A. esey ta SAM. Hues a mustra cu Polis a bay papia cu algun di esnan cu nan nomber ta aparece y nan a bisa cu esey ta suma cu nan debe J. den KIA. Ta placa di droga cu nan a cumpra for di J. Na cas di A.C.L.A., 554 gram di marihuana a keda confisca mientras cu na cas di S.L.A. a confisca ma di 19 kilo. Ta A.C.L.A. a hiba e marihuana na cas di S.L.A. y tabatin yabi di e cas. Esaki riba indicacion di J.
S.L.A. a bisa Hues cu e droga cu tabatin na su cas, A.C.L.A. a hib’e. El a bisa cu el a bay keda na cas di A.C.L.A. cu su famia pa asina deshaci di e droga. El a bisa cu e tabata busca placa for di hendenan pero no tabata sa cu ta placa di droga. Segun S.L.A., e tabata sa cu J. tabata fia hende placa y cu hendenan tabata paga bek. Hues a mustra cu e amiga di S.L.A. a declara cu tin biaha S.L.A. tabata cobra mas di 1000 florin y cu e tabata hiba e placa pa A.C.L.A. S.L.A. a bisa Hues cu esey no ta berdad. El a bisa cu door di e presion di Polis, e amiga tabata duna declaracionnan pa asina sali for di e presion. S.L.A. ta para riba cu e no tin nada di haci cu e caso aki. A.C.L.A. a bisa cu e no tin nada di haci cu asunto di droga. El a bisa cu el djis haci loke J. a pidie.
Hues a bisa cu tin hopi declaracion di otro personanan pero a usa algun pa confronta e dos sospechosonan cun’e. Ta asina cu J. a wordo conden’a segun A.C.L.A. na 8 aña di prison.
Fiscal: Fiscal a bisa Hues cu e no ta haya proba cu S.L.A. tabata bende y colecta placanan di droga pa J. cu ta encarcela. Den caso di A.C.L.A., e situacion ta otro. Fiscal a mustra cu A.C.L.A. a declara cu e tabata warda droga y tabata hiba marihuana y cobra placa pa su pareha J. Fiscal a bisa cu e no tin motibo pa duda den declaracion di hendenan cu a cumpra y paga A.C.L.A. Fiscal a mustra cu Polis a haya 554 gram di marihuana serca A.C.L.A. Casi 20 kilo di marihuana a haya den e apartamento di S.L.A., cual A.C.L.A. a hiba mas o menos 1 siman promer cu nan a wordo deteni. S.L.A. a bisa cu riba peticion di A.C.L.A., el a warda e droga pa J. Tambe tin declaracion di J., kende ta admiti cu e droga ta di dje. Fiscal ta haya cu A.C.L.A. y S.L.A. ta complice di posesion di casi 20 kilo di marihuana. Tambe cu A.C.L.A. durante 6 luna, riba instruccion di J., a bende marihuana y cobra placa.
Fiscal a exigi pa S.L.A. 21 luna di prison di cual 3 luna ta condicional. Esaki cu un tempo di prueba di 3 aña. Fiscal a exigi pa A.C.L.A., 2 aña y 6 luna di prison, di cual 6 luna ta condicional cu un tempo di prueba di 3 aña. Fiscal a bisa cu e droganan mester wordo destrui, e placanan ta keda confisca. E brommer y auto lo por debolbe.
Abogado: mr. Illes di S.L.A. a bisa cu na November 2024 a haya casi 20 kilo di Marihuana den S.L.A. su apartamento. E abogado a bisa cu e ta comparti opinion di Fiscal cu no por persigui S.L.A. pa bendemento di marihuana. Pa loke ta e di dos acusacion, S.L.A. sa cu e ta castigabel. El a facilita su prima A.C.L.A. yabi pa sconde marihuana pero no tabata sa cuanto. E abogado ta considera esaki posesion pasivo di droga. El a mustra cu durante su detencion den KIA, S.L.A. a contagia cu tuberculosis. El a bay 14 dia sera den isolacion di psychiater. Tres dia e no a haya cuminda y otro biaha nan tabata tira cuminda p’e. Te dia di awe S.L.A. ta haya pildernan pa bebe pero no sa con su situacion realmente ta. E abogado ta haya e trato aki ta inhumano. El a bisa cu S.L.A. tin derecho pa ta sinti su mes sigur den KIA. Mr. Illes a pidi Hues pa tene cuenta cu tur esaki. E ta haya cu S.L.A. a haya suficiente castigo y mas castigo lo ta disporpocional. E abogado a bisa cu e ta kere cu un castigo igual na loke S.L.A. ta sera caba, lo ta suficiente.
Mr. Emerencia di A.C.L.A. a bisa Hues cu e no ta haya cu A.C.L.A. tabata bende marihuana. El a mustra cu tin otro persona U., cu a duna declaracion y e no ta wordo persigui. E declaracion di e otro personanan no ta mustra cu A.C.L.A. tabata bende droga. E abogado a mustra cu A.C.L.A. enberdad tabata bende paña y no manera ta acusa cu e lo tabata cobra placanan di droga. Na opinion di abogado, e viahamento di A.C.L.A. no tin nada di haci cu asunto di droga. E abogado a bisa Hues cu e no ta haya cu por bisa cu A.C.L.A. ta complice di casi 20 kilo di marihuana. Na opinion di mr. Emerencia, A.C.L.A., a sigui instruccion di J. pa hiba e droga pero e no tabata sa cuanto e ta. E abogado a bisa Hues cu A.C.L.A. sa cu el a haci malo. E abogado ta haya e castigo exigi desproposional y ta kere den un castigo combina cu trabao pa comunidad.
Sentencia: Hues a sera tratamento di e caso y a dicta sentencia di biaha. Hues ta haya cu den caso di A.C.L.A., tur dos acusacion proba. A haya droga den su cas y cas di S.L.A. Hues a mustra cu A.C.L.A. su declaracionnan na Polis ta papia bon cla di droga pa 6 luna y no tocante bendemento di paña. Hues ta haya cu tabata cobra placanan di droga y tin un lista di nombernan y tres a confirma cu tabata paga placa di droga cu debe J. Hues ta haya S.L.A. culpabel di posecion di marihuana. Hues ta haya nan dos complice di e casi 20 kilo di marihuana. Declara S.L.A. liber di bendemento di droga. Hues ta haya cu S.L.A. tabata cobra placa pa J. pero no tabata sa cu ta placanan di droga.
Castigo: Hues a condena A.C.L.A. na 2 aña y 6 luna di prison, di cual 10 luna ta condicional cu un tempo di prueba di 3 aña. Hues a condena S.L.A. na 16 luna di prison di cual 8 luna ta condicional cu un tempo di prueba di 2 aña.
Hues a ordena pa e droganan wordo destrui, e placanan lo keda confisca, e auto tambe lo keda confisca. E brommer lo wordo debolbe. Celularnan lo keda confisca.
