Mientras Hulanda aporta cu capital enorme na defensa na Europa
- Cinco porciento di Produccion Bruto Nacional di Hulanda pa NATO?
- Situacion Venezuela y Essequibo tin mes base cu Rusia/Ukraine
ORANJESTAD (AAN) “Cu informacion tocante seguridad nacional di Aruba no por worde divulga sin mas, ta conoci pa tur hende. Pero Aruba mester cuminsa ricibi informacion riba e forma cu medidanan di seguridad pa Aruba den e situacion mundial actual, a worde tuma.”
Informantenan clave di Aruba ta rechaza e situacion actual den Reino, den cual nan ta sinti falta di informacion ariba medidanan cu ta wordo tuma y placa cu lo wordo gasta directamente pa garantisa mihor seguridad pa Aruba, cu ta situa den porta di Aruba.
E reclamo di informantenan no ta sin base debi na e forma cu Nicolas Maduro mes a expresa su mes encuanto respet pa e hecho cu Aruba ta parti di Reino ora el a menciona den pasado cu Aruba ta keda den “awanan teritorial di Venezuela”.
Manera a keda presenta na DIARIO sin duda Reino lo ta alerto, pero ta sumamente dificil pa acepta cu e luna aki NATO (OTAN) ta prepara pa haci inversionnan na cual Hulanda como pais Europeo mester aporta capital enorme en bista di e situacionnan nobo cu a desaroya na mundo, cu ta prepara pa guera.
Informantenan ta sumamente preocupa cu e topico cu tin henter mundo den su gara cu ta e peligro di un guera pa cual henter mundo ta prepara, no ta ricibi e atencion debido na Aruba, cu ta incapaz pa defende su mes y tin un naturaleza cu ta hacie mucho mas vulnerabel.
E hecho cu Aruba ta un pais cu ta basa su economia ariba turismo, ta haci Aruba mas vulnerabel pasobra e oportunidad pa un comunidad chikito controla bon kende ta drenta como bishitante pero cu otro intencion, ta hopi chikito.
Ta insisti riba loke a pasa den pasado na Aruba, cu a wordo asalta di dia cla cu un preparacion enorme, cu mester sirbi como les pa Aruba.
Manera a bini dilanti e luna aki e organisacion transatlantico cu a nace como resultado di Segundo Guera Mundial lo reuni pa asina atende riba e amenaza serio di un guera mundial y ariba e forma cu mester inverti den NATO y den seguridad di Aruba.
DIARIO na varios occasion a trece dilanti cu ta sumanan enorme cada pais mester inverti y cu manera a wordo anticipa por spera cu paisnan miembro di NATO mester hinca cinco porciento di nan producto domestico, pues placa cu nan ta produci, den e afan pa aumenta e poder arma di Europa.
Reino ta responsabel pa Aruba, cu no ta miembro di Union Europeo y cu mester scucha awor kico por spera den e situacion mundial sumamente peligroso y cuanto placa di Reino ta wordo hinca den e upgrading di e situacion di seguridad di Aruba.
E tema aki a wordo trece dilanti ya den pasado dor di DIARIO a base di informantenan cu awor ta puntra nan mes si den e situacion mudnai actual, e seguridad di Aruba no mester ricibi tur atencion y Pueblo no mester scucha cuanto placa ta wordo inverti dor di Reino den defensa di Aruba y cual ta e pasonan cu ta tuma pa Aruba, cu detayes cu Pueblo di e parti Europeo di Reino Hulandes, pues Hulanda, si ta ricibi.
A wordo mustra cu Nicolas Maduro ta uno di e peligronan mas grandi den region y hasta a trapa riba Nacionnan Uni ora el a decreta cu ya Essequibo, parti di Guyana, ta parti di Venezuela.
Hasta un gobernador ya a wordo nombra dor di Venezuela pa Essequibo pa medio di e forma cu a hunga cu e asunto durante eleccionnan di Venezuela.
Informantenan ta insisti pa na caminda pa e reunion di NATO, informacionnan concreto wordo duna na e Pueblo di Aruba di loke Aruba por spera ariba e tereno di seguridad nacional y inversionnan cu lo wordo haci den e medidanan cu e situacion mundial sumamente serio ta exigi.
DIARIO lo sigui informa Aruba mientras NATO ta prepara pa e epoca nobo di armamento.
E situacion ta serio debi na e hecho cu e actual Secretario General di NATO ta e ex Prome Ministro di Hulanda, Rutte, cu ta prepara Europa pa e reunion cumbre cu lo trata e seguridad di paisnan miembro di NATO y ampliacion di nan defensa.
Si awe mundo ta enfrenta guera mundial ta pasobra Rusia a invadi Ukraine y a kita libertad di e pais mientras den e region di Aruba ta topa cu Nicolas Maduro cu a tene hasta eleccion pa Essequibo contra tur regla di hasta Nacion Uni!
