Michel Bernabela di PPA:
ORANJESTAD(AAN): Den un entrevista cu Michel Bernabela di PPA, el a papia di transporte pa e hotel nobo Secrets.
“San Nicolas finalmente a haya e oportunidad pa desaroya su mes, pues nos tin un bunita hotel cu a habri aworaki”.
Manera nos lider di partido Otmar Oduber a bisa recientemente, e hotel sigur ta yuda trece desaroyo economico pa San Nicolas, pasobra restaurantnan ta haya un bida, e Car Rentals tambe y transporte publico, segun Bernabela.
El a splica cu pa loke ta transporte publico e ta enfoca riba taxi, cu ta un materia den cual e tabata hopi envolvi caba den pasado.
“Nos tin un hotel nobo akinan y esey ta nifica cu e infrastructura mester cuadra tambe, pa nos por brinda e servicio na nos turistanan”.
Aworaki ta un bon momento pa por haci uso di entre otro tecnologia pa tin un servicio mas eficiente pa nos turistanan.
Mirando cu e ta e pilar di nos economia, nos ta busca pa hacie mihor, segun e miembro di PPA.
El a sigui bisa cu quizas awor ta e momento ideal pa trece mas eficiencia pa e taxistanan y nos turistanan.
Segun Bernabela, mester mehora pasobra nos transporte publico na Aruba tin mester di hopi atencion.
El a dune un ehempel unda cu tin hende cu tin cu cana basta un pida prome cu nan por yega na un caminda unda cu bus of auto bus ta pasa.
Pa hende di edad halto esaki sa forma un basta bon problema.
“Na otro paisnan transporte publico ta yega cerca bo na bo cas y mi ta kere cu nos a yega na e momento unda cu esey mester ta posibel na Aruba tambe”, segun Bernabela.
El a splica cu e ta trahando riba plannan pa taxistanan traha na un manera mas eficiente y trece mas igualdad entre e taxistanan pa loke ta e cantidad di trabao cu cada un ta haya.
