ORANJESTAD (AAN): Dentista Dr. Henk Marsman a duna di conoce cu den diferente ocasion el a manda un peticion na Minister di Salud Dangui Oduber,
Ministerio di Salubridad y Ministerio di Salud pa sa con e para cu e denuncia cu el a haci contra Dr. Kawaiah.
El a bay Tuchtcollege y eynan el a entrega keho contra e dentista cu ta yama su mes como specialista y cu ta trahando for di basta aña aki na Aruba.
El a laga sa cu Aruba Dental Society tambe a cay aden y nan tambe a manda carta pa minister y pa DVG. E ta haya un falta di respet di e mandatario cu no ta duna contesta su carta ni esun di Aruba Dental Society.
Marsman a laga sa cu dia 8 di Juli pa 11 am tin un reunion cu Tuchtcollege y e ta spera cu eynan si nan por keda cla.
El a agrega cu mester percura pa salubridad funciona bon y ora tin un apel putri den e sistema y ta wordo notifica mester actua al respecto. "E docter aki, e Kawaiah aki e tabata tin diferente veroordeling na Canada cu el a sconde pa Aruba y tambe akinan el a falsifica un Covid Test di 50 dollar na airport cu nan a gar'e", a expresa.
E tipo di personanan aki cu ta comete fraude nan ta haci e cosnan aki varios biaha y nan ta gaña. Pesey Marsman ta kere cu e personanan aki mester saca nan for di Aruba, a agrega.
DIARIO tin entendi cu tin mas keho entrega y te hasta caso den Corte contra e dentista aki y Dr. Marsman mes a señala cu e mes a bay Tuchtcollege cual ta un caminda di cruz.
E siman aki mes a laga sa, el a haya un pashent di Dr. Kawaiah cu ta un mucha muher di 17 aña cu tin 4 aña cu el a wordo trata eynan pero desaster a wordo haci den su boca.
Te na e momentonan aki, a pesar di e kehonan existente contra di e dentista nada ta wordo haci contra dje.
Parce cu e docter en cuestion, cu gobierno di AVP el a drenta Aruba y si gobierno mes a haci un fout mester admiti esey. "E meneer aki tambe a bin cu papel falsifica. Dus e ta masha facil pa bo bisa hey, abo mes a gaña nos, pero aworaki nos ta actua y bo tin cu bay", a declara.
El a cuestiona tambe e evaluacion di diploma pasobra tur hende a keda keto den e caso aki.
E ta kere cu tin miedo di tuma medidanan contra di Dr. Kawaiah. E ta spera cu e gobierno nobo por haci algo y wak pa atende e problema serio cu tin akinan Aruba y pa no tin cosnan ilegal.
Pa loke ta Ministerio Publico el a bisa cu eynan tin falta di hende cu capacidad pa atende esaki, Dr. Henk Marsman a declara.
