Dos periodista a bay canta cancion di ‘Tequila’ den Karaoke cu Aruba Bank

ORANJESTAD (AAN): Relaciona cu e celebracion di Dia di Prensa, gerencia di Aruba Bank a organiza un anochi di cantamento na establecimento di ‘Esperantos Aruba’ na Renaissance Marketplace.

   E evento, cu su meta pa celebra hunto cu miembronan di prensa, pa bisa danki y refleha riba e importancia di e rol importante cu cada un miembro tin den comunidad.

   E anochi yama ‘Karaoke Time’ tabata uno agradable unda miembronan di prensa a haya chens di relaha, refresca garganta, y combersa riba diferente update di loke ta pasando den mundo di noticia.

   E celebracion di Dia di Prensa tabata un dia pa recorda, cu e oportunidadnan pa conecta cu otro den un seno amical.  Representantenan di banco y miembronan di prensa a haya e oportunidad pa conecta di un manera of otro door di canta a la karaoke style, por a disfruta di un ambiente festivo cu a sigura un experencia memorabel pa tur presente.

   E huespednan dinamico di Aruba Bank, a percura pa tur hende a goza di e anochi aki purbando nan suerte cantando Karaoke.  Y mas cu claro, varios a sa di demostra con bon nan tonada ta.  Tambe a mira cu e periodistanan Leo y Marko a dicidi na sigui cu e trend introduci door di America’s Got Talent, unda a bay canta e cancion “Tequila” di e grupo The Champs.

   Pero e cancion aki, ta contene solamente 3 palabra den e cancion di 2 minuut, esta unda nan ta bisa “Tequila” solamente tres biaha.  Claro cu Leo y Marko a grita ‘Tequila” e prome dos biaha, y e ultimo a duna chens pa conocido Toko Winklaar bisa e “Tequila”.

   E ganadornan di e anochi a keda den persona di Julisa Hoevertsz (Karaoke Champ), Larissa Bermudez (Crowd Entertainer) y Seever Krozendijk (The Window Breaker).

   Aruba Bank ta orguyoso di por a organiza otro evento pa celebra Dia di Prensa. Nos kier a yama danki na tur esnan presente cu a haci e evento aki uno exitoso

  Na final, Aruba Bank a sorprende tur hende tambe cu un Mariachi cu a anima tur hende aun mas.