- Horcan Gabrielle ta dal un vuelta riba Oceano pa e bolbe cas
- Region di Caribe y Merca cu laman super cayente na 2025
ORANJESTAD (AAN) Tur e elementonan necesario tabata presente na momento cu NOAA, e instancia Americano encarga oficialmente cu informacionnan pa e region Atlantico, a anuncia un temporada di horcan riba normal pa 2025.
Un calor tremendo den e region y tambe na Aruba, na inicio di September tabata duna tur indicacion cu e luna den cual por a spera activacion importante di e temporada di horcan, lo a percura pa basta motibo pa region di Caribe, Golfo di America y Atlantico prepara pa basta actividad.
Calor a keda e toke principal di September y mientras September tabata na caminda pa su ultimo parti, mas y mas por a scucha e opinion cu expertonan a duna un pronostico robez.
Inicio di e ultimo siman completo di September 2025, a entrega e gran realidad, cu hende no por dicidi pa naturaleza y siman a habri cu un horcan cu a haya nomber di Gabrielle y dos zona den Oceano Atlantico cu ta worde vigila.
Den e region di Golfo di America, un through cu ta un sistema di aire friu, a staciona su mes mientras ariba Oceano Atlantico Gabrielle a sigui uza e laman sumamente cayente pa bira un horcan mayor, cu por causa basta daño, di categoria number 3.
E presion minimo den centro di e sistema tabata 955 milibar, mientras e sistema tabata sigui haya mas forza mientras e tabata biaha den un rumbo Noord.
Pa e islanan na Noord di Caribe y e costa di Merca, su movecion a mustra cu e peligro grandi lo no a alcansa e islanan di Caribe ni e costa Mericano.
E olanan di Gabrielle a afecta e costanan di Merca y algo isla mientras e tabata haya mas forza mientras e tabata progresa den direccion Noord.
Expertonan tambe en espera di e momento cu Gabrielle lo a realiza un maniobra cu lo a pone cambia rumbo completamente y dal un vuelta pa bolbe cruza laman Atlantico y bay afecta islanan Azore, di cual Madeira ta uno conoci.
Mientrastanto dos sistema nobo ta worde observa di acerca den e parti di mas ariba di Atlantico.
E dos sistemanan tropical tin chens pa sigui desaroya den e Oceano Atlantico cayente.
Informantenan ta indica na DIARIO cu e presencia di e sistemanan ta adverti cu temporada di horcan a cuminsa y cu mester vigila mientras condicionnan pa sistemanan tropical crece, continuamente ta worde alimenta den e oceano cayente.
Aruba sigur mester vigila desaroyonan ariba e costa Venezolano, cu durante ultimo simannan a conoce varios momento di crecemento di nubianan door di keintamento di tera y humedad presente, cu por bira productor di yobida.
