Director di SKOA Anuesca Baly:
ORANJESTAD (AAN) – Señora Anuesca Baly, Director di SKOA a menciona cu aña pasa SKOA tabata tin alrededor di 700 areglo di pago, locual tabata hopi, pasobra prome cu e pandemia tabata mas of menos 250 areglo di pago y durante e pandemia esaki a subi drasticamente.
Den e transcurso aki hopi mayor a perde trabao, of no tabata siguranza di trabao, y nan a haci un areglo di pago. Baly a splica cu SKOA a duna tur persona cu a pidi pa un areglo di pago un aña di tempo pa paga esaki y nan mes ta dicidi ora di yena e formulario, con nan ta dividi e pago pa nan cumpli cune.
El a menciona cu SKOA a habri e areglo di pago na April di e aña escolar anterior, bay te e aña siguiente pa caba di pague prome cu e alumno drenta scol. Pues tin practicamente casi un aña, pa paga e 175 florin.
Aña pasa SKOA a dicidi di pone e scolgeld hunto cu e suma pa airco y mayornan a haya e oportunidad di haci un areglo tambe pa pago di airco, cual ta wordo calcula door di e cabesante di scol.
Di e 700 areglo di pago cu tabata tin aña pasa, mayoria di mayor a cumpli. Director di SKOA a menciona cu aña pasa nan a haya un bon donacion di Aruba Bank, y tambe di Women’s Club y famia Hoevertsz, unda cu alumnonan yiu di mayornan cu at all no tabata por paga, despues di un sondeo, for di e donacionnan aki a paga esaki pa e muchanan, y a cubri nan scolgeld y aircogeld.
Anuesca Baly a comenta cu hopi mayor ta haya asistencia social, of yudanza di instancianan manera HIAS, Cruz Cora, DAS.
Pa motibo di esaki SKOA a cuminza cana e caminda di pone cierto cosnan den colaboracion cu e tres instancianan menciona, unda cu mayornan sa cual caminda pa cana, y si nan no cumpli SKOA ta pone e instancianan aki na haltura, unda cu nan ta yuda nan y guia nan tambe.
“Pa locual ta e aña escolar pasa nos ta hopi contento y e aña akinan tambe nos tin pendiente donacionnan cu mester drenta, y mi tin cu bisa honestamente cu nos no a haci e peticionnan oficialmente ainda, pasobra nos ta warda pa wak e fluho di mayornan cu tin necesidad severo, pa duna nan esaki. Nos ta haya tambe un lista di DAS, pasobra tin mayornan cu ta haci peticion eynan, pero si e peticion no ta wordo honra e ta bay den e di dos grupo, cu si nan no wordo yuda nos ta bay wak kico ta e motibo y sea cu nan ta bin na remarca pa haya un yudanza di un otro instancia”, Anuesca Baly, director di SKOA, a splica.
Encuanto e aña escolar aki, SKOA tin alrededor di 600 areglo di pago cu a wordo cera, for d April te aworaki. “Locual ta e peticion pa areglo di pago pa e aña escolar aki, a wordo cera dia 30 di September, kiermen no por haci peticion mas. Pues, tur mayor cu no a cumpli ainda cu pago, cu mi ta kere cu no ta hopi, pasobra nos a pidi tur mayor cu prome cu e alumno drenta scol tin un pago haci”, director di SKOA a inidica.
Esaki ta pasobra den e scolgeld tambe tin un parti pa un seguro chikito, pa ora cu tin actividadnan pafo di e tereno di scol e seguro ta cubri cualkier accidente of algo cu pasa cu e alumno.
