Parlamentario Ricky Hoek:
ORANJESTAD (AAN): E problema persistente di uzo di substancia y adiccion ta un preocupacion global. Na Aruba tambe e ta un preocupacion. Esaki ta afecta tanto e sistema familiar y comunidad.
Ora ta papia di uzo di substancia, ta referi aki na uzo di alcohol, tabaco, droga (marihuana, cocaina y otronan) y medicamento prescribi. Ora un persona ta uza un substancia te na e punto caminda su relacionnan y e abilidad di haci su tareanan y actividadnan diario ta keda afecta of e persona ta comete un crimen bou di influencia, por bisa cu e persona aki tin un problema cu uzo di substancia.
Problema di uzo di substancia y adiccion hopi bez ta wordo considera como un problema cronico di e circuitonan den e celebro cu ta relaciona cu recompensa, motivacion y memoria. Adiccion ta afecta e neurotransmision cerebral. Pues e abilidad di e persona cu tin e trastorno di controla su propio uzo di substancia, especialmente ora e ta bou di influencia.
Uzo excesivo di substancia y tambe adiccion ta afecta e persona en cuestion, su famia y comunidad den asina tanto forma. E persona por perde trabou, deterioro di salud físico y mental, aumento di crimen y violencia, situacion economico precario y reduccion di calidad di bida. Asina aki e comunidad tambe ta keda perhudica pasobra ta bay tin mas desempleo, problemanan cronico di salud (p.e. diabetes, riñón), mas violencia den casnan di famia, consecuencia fatal den trafico y pobresa. Tur ta conduci na problemanan social structural.
Actualmente y den futuro Aruba lo por lidia cu e problemanan social structural aki? Aruba lo tin ciudadanonan saludabel suficiente pa traha na su progreso? Acaso Parlamento di Aruba mester bin cu ley mas severo cu ta pone e persona cu causa un di e problemanan aki para responsabel pa su actonan? Por ultimo, prevencion y concientisacion di uzo di substancia mester keda reinforza pa asina mitiga e problemanan social den nos comunidad.
