Desiree Helder, director di CBS:
ORANJESTAD (AAN)—Señora Desiree Helder, director di CBS a agrega, den su splicacion amplio den conferencia di prensa, cu e Sistema Nacional di Estadistica ta sigui standardnan internacional, pasobra internacionalmente, door di Nacionnan Uni, entre otro organizacionnan mundial, manera ILO, etc., nan ta pone standardnan disponible pa tur pais cu kier traha riba estadisticanan oficial, por sigui nan.
Esaki ta e standardnan cu semper como CBS nos ta uza y semper nos lo uza pa e estadisticanan oficial.
“Pasobra esakinan ta standardnan cu ta sirbi ora cu nos publica un estadistica nacional, oficial, tambe e situacion na Aruba por wordo compara cu e situacion na otro paisnan, pa wak con e desaroyo di Aruba ta, referente na e desaroyo di otro paisnan, manera nos islanan ruman pero tambe e desaroyo cu tin na Hulanda, Merca, Islanan den e region”, Desiree Helder a indica.
El a enfatiza cu NSS ta un proyecto sumamente valioso y importante, y el a wordo parti den cinco proyecto cu lo wordo encamina casi pareu. “Manera e minister a indica caba, nos lo introduci un legislacion nobo pa guia e proceso di e trabaonan cu lo wordo haci door di e Sistema Nacional di Estadistica (NSS) aki.
E ta indica ken ta responsable y pakico, y cu e datonan cu nos ta colecta y nos ta uza pa traha estadistica ta proteha, pasobra e datonan individual di e persona di hogar, di companianan cu ta wordo uza pa produci estadisticanan semper keda anonimo y proteha, y cu e ley aki nos ta garantiza esey tambe”, Desiree Helder a subraya.
E dama a añadi cu den e mesun ley aki tin e asina yama un “code condos” y esnan cu ta trahando riba e estadisticanan aki tambe ta wordo mara na e ley, pa asina proteha full e coleccion di datonan estadistico y di datonan individual.
“Banda di esey, nos ta bay institui e plataforma aki oficialmente, tambe via di un comision diario cu lo trata tur e trabaonan cu lo wordo haci door di NSS, y tambe nos lo construi un plataforma nobo y digital pa tin tur e datonan aki hunto, pa por traha estadisticanan hopi miho y mas lihe. Ta asina cu e lo wordo compaña pa un plataforma digital tambe, cu lo wordo publica. No ta asina cu e datonan cu lo wordo publica ta bin solamente den un tabel, grafic of cifra, sino cu na banda di esey nos lo publica tur informacion pertinente di tur e proceso cu a wordo encamina, ora di traha e estadistica aki”, director di CBS a remarca.
Desiree Helder a reitera cu tur usuario cu ta subi e website of e plataforma digital aki lo haya tur informacion cu nan mester, pa dicidi si uza e dato aki y di ki manera nan por use.
Pa conclui el a bisa cu e training di e personal ta hopi importante tambe, y cu esaki ta e di cinco proyecto, pasobra den estadistica tin hopi desaroyo cu ta anda, y ta pasa hopi lihe. El a expresa ta asina cu e metodonan pa compila data, pa pone data hunto, ta desaroyonan cu ta pasa hopi lihe y mester keda “on top of them, pasobra si nos kier produci datonan oficial, di un calidad halto pero tambe na tempo, nos mester bay pareu cu e desaroyonan y bon entrena. Pesey e training di e personal ta hopi esencial pa garantiza cu e datonan cu nos ta produci ta esnan cu enberdad ta wordo uza pa maneho nacional”, señora Helder a bisa, finalmente.
