Ban stop abuso sexual di mucha
ORANJESTAD (AAN): Manera DIARIO a yega di trece dilanti caba, Fundacion Mi Voz Ta Bo Voz ta sigui traha duro pa concientiza pueblo riba e asunto penoso di abuso sexual di muchanan cu ta keda wordo cometi na Aruba.
Fundacion a caba di haya un fenomenal donacion di KLM Kids 4 Kids Marathon, y nan a earmark e fondo aki pa sigui cu e proyecto cu ta dirigi na muchanan di Scol Preparatorio (‘Kleuterschool’) pa prevencion di abuso sexual di mucha.
Na Maart nan tabatin e proyecto di “Love and Protect Yourself”, cu tabata e prome aña cu el a wordo duna na Maria College MAVO y cu ta dirigi riba hobennan di 12 aña bay ariba, pa nan siña nan con pa proteha nan mes den aspecto di defensa propio, pero tambe mentalmente nan por ta prepara ora di haya nan mes den situacion asina aki.
Lisette Gomes di Fundacion, a splica cu e organizacion na Aruba a ricibi training di un siman for di e grupo di ‘Bos di Hubentut’ na Curaçao, y esaki a pone cu e Fundacion na Aruba sa con pa atende e grupo di muchanan di Scol Preparatorio, esta specificamente pa muchanan di di 4 cu 5 aña di edad, pa por cuminsa prepara nan si nan mester haya nan den caso di abuso sexual.
Como cu na Aruba toch tin programanan di prevencion, pero hopi biaha dirigi riba e hobennan di edad mas halto, y toch lamentablemente abusonan sexual ta cuminza riba criaturanan cu ta baby ainda. Pesey ta importante pa cuminza concientisa e muchanan aki for di edad chikito caba pa nan conoce nan curpa, y pa nan “papia” trempan y evita lo peor.
Na Aruba, e casonan di abuso sexual no a stop. Nan ta parce di ta mustra di ta mas hopi, pero esaki tin di haber cu muchanan awor ta “papia” mas y ta divulga loke a wordo cometi contra nan.
Sigur e Fundacionnan na Aruba dedica na combati esaki, a logra kibra un tabu hopi grandi na Aruba. Varios instancia y grupo a lanta, a hasta tene manifestacion grandi, y sigur mayornan a cuminza papia cu nan yiunan. Pesey mes posiblemente e casonan a aumenta, djis debi cu mas mucha a cuminza papia y basha abao loke hende ta haci cu nan. E unico lamento ta cu e muchanan ta papia ora cu ya caba ta laat.
Pues e meta principal ta pa bringa, pa yega na e parti prevencion cu pa Fundacion Mi Voz Ta Bo Voz ta e solucion pa e tema aki. Lisette Gomes a indica, cu danki na e prevencionnan aki, di awor en adelante cualkier cos chikito cu bay robes, e mucha tin curashi pa papia cu su mayornan of docente di scol, cu algo ta pasando cu nan.
