Donacion di buki di José Miguel S. Donata na Biblioteca

ORANJESTAD (AAN): Sr. José Miguel S. Donata a haci un bunita donacion na Biblioteca Nacional Aruba e siman aki.

E autor a publica diferente buki cu temanan historico. Pa su coleccion biblioteca a haya 4 ehemplar di e produccion ‘Mi wela a conta mi’ (2018) y tambe ‘Ayera y awe e pintor Arubano Joannes Donati’ (2016). Sr. Donata ta sigui su interes y fascinacion pa un tema (historico) y ta explora y studia esaki pa despues traha riba un publicacion basa riba estudio profundo den diferente documento/fuente. Biblioteca a ricibi tambe 4 ehemplar di su ultimo buki titula ‘Arubaanse dove kinderen in Suriname’ (2023) y ademas 4 ehemplar di ‘Cariñosamente... Recuerdonan di mi wela y otronan’. Tur por fia/lesa na biblioteca.

   Jose Miguel S. Donata a nace na Aruba y ta docente di Spaño. Su pasion ta historia (oral) y folklore di Aruba y e aspectonan tipico Arubiano di nos lenga Papiamento. Otro area di interes ta e relacionnan entre Aruba cu otro pais y isla den region di Latino America y Caribe.

   Sr. Donata tin un ‘Bachelor of Arts y un Master of Arts den Languages and Cultures of Latin America/Spanish’.

   Otro publicacion di sr. Donata ta ‘Trabao a habri na Cuba! Arubiano na Cuba na cuminsamento di siglo XX’ (2010). Por consulta e publicacionnan na Departamento Arubiana situa den Bachstraat 5 y por fia nan na biblioteca publico.

E bukinan ta obtenibel cerca e autor mes, por haci un peticion via e-mail This email address is being protected from spambots. You need JavaScript enabled to view it. tambe.