Documentario 'The Prime Ministers' a causa un impacto durante Krioyo Film Festival na Corsou

ORANJESTAD (AAN): Durante Krioyo Film Festival na Corsou, e documentario Arubano The Prime Ministers a

logra causa un impacto grandi y positivo riba e publico grandi cu a bay mir’e. For di trempan caba productor Omar Harms y co-productor Addonsito Croes tabata presente pa ricibi e publico cu a bin mira e produccion. Entre otro por a nota presencia di ex Prome Ministernan di Antias Hulandes Maria Liberia Peters y Etienne Ys.

Na final e publico cu a consisti di basta Arubiano na Corsou y hende di Corsou a expresa nan alegria y aprecio pa cu e produccion. E comentarionan ricibi tabata cu e parti humano di Aruba su 4 Prome Ministernan a resalta den grandi. Entre otro a ricibi comentario manera:  “Omar y Addoncito, hopi bon documental! Bunita, emocional y informativo”

The Prime Ministers tambe ta nomina pa e Kadushi di Oro 2025. E festival su exito ta grandi y comotal a dicidi cu ta alarg’e pa un siman mas. Omar Harms na final a gradici tur colaborador y tambe Cultuur Fonds Caribisch Gebied pa e apoyo ricibi pa cu e proyecto aki.