ORANJESTAD (AAN): Recientemente e studiante Francesca Arrindell a defende su tesis exitosamente y
a obtene e titulo di ‘Bachelor of Arts’ for di e programa Organization, Governance and Management, Facultad di Arte y Ciencia.
Francesca a defende su tesis ‘’Exploring Aruban Visual Art Studios: Revealing Innovative Characteristics and Possible Strategies in Organizational Culture for the Creative Industry’’ dilanti di e comision di graduacion cu tawata consisti di Thaïs Franken, MSc, Drs. Yolanda Richardson, y Ana Maria Hernandez, MSc. Ademas tabata presente manager di e programa OGM, Ahmet Talan, MSc, famia di Francesca Arrindell, docente di Universidad di Aruba y colega di estudio tambe tawata presente.
Francesca a investiga con innovacion ta wordo practica den e cultura di studio di arte visual. Ademas, e caracteristicanan, forsa, debilidad, oportunidad y menasa relaciona cu studio di arte visual. E meta ta pa duna solucion strategico basa riba e descubrimentonan di e analisis, pa apoya e crecemento di industria creativo Arubano.
E participantenan di e investigacion ta consisti di algun empleado of artista cu a representa nan studio di arte visual y algun organizacion cu ta apoya studio di arte visual den industria creativo Arubano.
Un di e recomendacionnan ta pa e studionan di arte visual inverti mas den ekipo pa crea un ambiente di trabao mihor ekipa y eficiente. Ademas, practica den maneho di negoshi, administracion y mercadeo ta fundamental pa yuda artista bende y maneha nan obra di un manera efectivo. E estudio tambe ta enfatisa e importancia di busca apoyo financiero pa fortalece durabilidad di nan studio di arte visual. Adicionalmente, e tesis ta presenta dies strategia pa guia e desaroyo di studio di arte visual na Aruba.
Ta gradici e docentanan di e departamento di OGM y profesional cu a yuda of guia Francesca como studiante. Tambe ta gradici tur esnan na, y pafo di Universidad di Aruba cu a contribui na un manera of otro na e acontecimento aki.
Pa lesa e resumen of tesis di e studiante, por fabor bishita e pagina di publicacion di Universidad di Aruba via e website:
Pa mas informacion tocante e estudio OGM, bishita e website di Universidad di Aruba na http://www.ua.aw/ogm
DIARIO ta felicita e graduada, su famia y amigonan.
