Docternan a kita un tumor di 1½ kilo cu a extende te na curazon di mucha muher di 8 aña

Nan a hasta stop su curason di bati

ORANJESTAD (AAN): E siman aki, un informacion den noticia medico a bin for di Roma, na Italia. Un mucha muher a wordo diagnostica cu un tipo di cancer di riñon conoci como ‘Tumor di Wilms’, y a wordo someti na un operacion cu a dura mas di 9 ora despues di a reduci e tamaño di e cancer cu seis ciclo di chemoterapia prome cu nan a cuminsa su operacion.  Esey ta un informacion cu e Hospital mes a divulga via un boletin emiti na italiano na e website aki:

www.bit.ly/tumorgrandi

   E operacion na e Hospital yama Bambino Gesù Ospedale Pediatrico tabata uno complica.  Pero awor na final un tumor cu peso di 1,5 kilo a wordo kita for di e mucha muher.  Dado momento nan mester a hasta stop su curason di bati.

   El a plama te na su curazon: Docternan a kita e tumor aki yama ‘nephroblastoma’ ta loke e Hefe di Departamento di Cirugia Oncologico, esta Dr. Alessandro Crocoli a confirma.  E ta mira e operacion exitoso aki no djis como un ‘victoria medico, pero tambe un speranza grandi pa hopi famia den situacion similar”, segun e boletin emiti pa Hospital.

    Pa varios luna prome cu e operacion, e mucha muher di 8 aña a pasa den seis ciclo di chemo, pa reduci e masa di e tumor.  A descubri cu e tumor den e riñon a extende den e via renal, tambe den e adernan paden cu a pone yega te na e parti drechi di curason.  Un team medico a usa tecnicanan di diagnostico di imagen pa por a haya un bista cla di e tumor, y cu pantayanan grandi den sala di operacion, tabatin un bista 3D di e masa cu nan tin di saca afo.  Pero esaki a rekeri e colaboracion di un team multidisciplinario consistiendo di Oncologonan, Ciruhano, Cardiologo, Anestesiologonan, y Specialistanan den imagennan medico.

   A suspende curason di bati: Durante e operacion mes, e riñon banda drechi (cu tabata 10x mas grandi cu normal debi na e tumor) a wordo saca di e curpa.  Ciruhanonan di curazon e ora a stop e batimento di curason di e pashent chikito, y a mantene bibo cu un circuito extracorporal.  Esaki tabata necesario pa kita e parti di tumor cu ya caba tabata creciendo den e atrium di e curason.

   E mucha muher a cumpli siman pasa su di 8 cumpleaño den Hospital, y awor despues di un estadia cortico den Unidad di Cuido Intensivo, e ta na caminda pa recupera completamente, segun e Hospital a divulga despues.  E tratamento lo sigui cu bestraling y despues mas ciclo di chemo.

   E potretnan pa cortesia di e Hospital, esta Bambino Gesù Ospedale Pediatrico.