ORANJESTAD (AAN)—E Arkeologo Raymundo Dijkhoff, di Museo Arkeologico di Aruba,
den entrevista cu DIARIO a duna di conoce cu Diasabra 25 di Januari aki, Dia di Libertador Betico Croes, e ta bay duna un charla referente na e Santana di Santa Cruz, fecha 1620 pa 1810, cu no a documenta y na ningun caminda na Aruba ta conoci cu tin evidencia cu un Spaño a wordo dera hunto cu indigenanan y cu nan yiunan, y ningun caminda na mundo, esaki a pasa.
Dijkhoff a menciona cu nan tin hopi analisis y informacion, y Diasabra 25 awo, e ta bay conta mas tanto tocante e excavacionnan cu a tuma lugar 2011, 2012, 2016 y mas tanto tocante e experiencianan.
El a splica cu hopi cos ta pasa rond di dje, pero hendenan no sa, tambe e logistica, network, bo ta haya sa ki tipo di analisis a wordo haci, y full un idea kico ta pasa rond di un excavacion cu esey ta loke hende ta wak, pero nan no sa kico ta pasa su tras, y e parti di impacto cu tabata tin riba e mundo nacional y internacional, pasobra mientras tanto nos ta 24 aña mas leu despues di 2001, pero den e ultimo diez añanan el a haya hopi informacion y nan analisis a bin bek y awo nan ta compronde cu den full Caribe, solamente, na Santo Domingo, Cuba, Belice y Mexico tin un sitio cu tin contacto colonial, trempan y tardio cu ta refleha e impacto di e encuentro entre Europeo cu Americano, con esaki a afecta e forma di dera pero na ningun otro lugar a haya spañonan dera hunto.
“Pero den e caso di Aruba, cu ta hacie no solamente unico den Caribe, den henter Continente Americano y full mundo, ta cu Caiquetio ta e unico indigena cu tabata un posicion proteha; e tabata indigena di corona real, te 1811 y esey a conduci cu nunca nan a wordo esclaviza, ni tabata tin e bida y situacionnan cu e otro indigenanan di e Continente a pasa den dje”, E arkeologo Raymundo Dijkhoff a trece dilanti.
