Docter Eric Vinck di Aruba gradua como Ciruhano Cardiovascular

• Cu beca di Aruba Scholarship foundation
• Beca tambe di Fundacion Promotion di Conocemento Cardiovascular den Caribe

ORANJESTAD (AAN): Despues cu el a termina su preparacion di Home Schooling Study na Aruba y Curaçao, Eric Vinck a cuminsa studia medicina (pre-med) na Xavier University School of Medicine na Aruba na Januari 2007.  Despues el a sigui na Universidad El Bosque (UEB) na Bogota, na 2009. E tabata un studiante briyante y ehemplar cu hopi disciplina y amor pa su estudio.

   Na aña 2015 Eric a gradua como Medico General. El a tuma un aña di preparacion pa continua cu un aña ‘rural’ pa e por obtene su licencia pa practica medicina na Colombia y pa por specialisa.  El a sigui specialisa den Cirugia General na 2017 na UEB, na unda el a gradua na 2021 como Ciruhano General.

   Su estudio tabata su pasion di bida. Semper Eric tabatin un inmenso dedicacion pa su carera di medicina y Aruba Scholarship Foundation cu hopi orguyo a otorga Eric beca pa e specialisa den Cirugia General.

   E hoben a continua su estudio na Juli 2021 cu beca di “Stichting ter bevordering van Cardiovasculaire kennis in het Caribisch gebied” y cu apoyo di docter Caspar Lacle Eric a studia un aña despues na Universidad Pontificia Bolivariana na Medellín, caminda el a gradua recientemente como Ciruhano Cardiovascular.

   Ta bon pa menciona cu el a traha como Ciruhano General na Clinica Victoriana y Clinica Cardio VID di 2022 to 2024. Esaki tabata durante e estudio di Cirugia Cardiovascular. Eric ainda ta eherce trabao di investigacion, tanto na Colombia como na diferente Universidad na Europa, e.o. na Leiden, Maastricht y otro parti di mundo. E tabata un studiante hopi versa pa su produccion elocuente y sigur pa su forma cla y conciso den su skirbimento. Te awor 60 articulo di dje a keda publica, tambe den revistanan renombra di medicina.

   Eric ta un persona hopi activo, continuamente c ta haci investigacion, buscando data pa su articulonan y pa enrikece su ekipahe di conocemento. Diferente ciruhano renombra el a asisti durante operacion cardiovascular y el a participa den transplante di pulmon y curason. Actualmente Eric ta haciendo su Ph.D. na Maastricht Universitcit (MUMC).

   Cu su carisma y cordialidad, compaña pa su conocemento cardiovascular el a gana hopi cariño di su pashentnan.

   Eric ta haciendo investigacion den Cardiocirugia desde 2019 y lo continua cu esey. Door di su investigacionnan exitoso el a haya e posicion di Editor Asistente, di ICVTS (Interdisciplinary Cardiovascular y Cirugia Thoracico), revista di Asociacion Europeo pa Cirugia Thoracico (2024). Eric a participa den diferente conferencia na Merca y America Latino.

   Awor cu su persona a gradua como Ciruhano Cardiovascular, el a haya e posicion di Ciruhano di Curason na Colsubsidio Clinica Cardiovascular y Clinica del Country y Los Cobos Medical Center na Bogota, Colombia.

   Eric a expresa cu e lo sigui busca manera pa yuda y cuida su hendenan di e islanan Hulandes, sea na Bogota of na e islanan mes. Desde mucha semper su mayornan tabata y ta apoya Eric cu su studiamento. Un estudio di medicina di 16 aña largo.

Un abraso caluroso di felicidad pa Papa Erick y Mama Edna.

   Na nomber di Presidente di Aruba Scholarship Foundation, Frits Goedgedrag, conhuntamente cu su team di ASF, cu gran placer ta comparti su alegria cu Eric pa e gran logro. Aruba Scholarship Foundation ta desea docter Eric Vinck hopi exito cu su carera nobo como Ciruhano Cardiovascular.   ASF Foundation a indica cu nan ta orguyoso di Eric.

   E relato aki DIARIO a prepara hunto cu Etley Lasten, miembro di Directiva ASF.