Alumnonan di Colegio Arubano orguyoso di e Comics Book cu nan a traha

Resultado final di proyecto ‘Deplastify the Planet’

ORANJESTAD (AAN): Recientemente e alumno- y docentenan di Colegio Arubano cu a participa den e proyecto di Erasmus+ cu yama ‘Deplastify The Planet’, a ricibi e producto final oficial di e proyecto.  E magnifico buki di cartoon di “Plastica’s Revenge” a wordo entrega na e alumnonan, docentenan, y Rectorado di scol.  Algun ehemplar di e buki di comics a wordo entrega como donacion na Biblioteca di Scol.  Pues nan ta disponibel pa tur alumno di Colegio Arubano pa nan lesa.

   Ora di mira con e buki di comics aki a keda, nan a keda hopi orguyoso di e bunita resultado final di e proyecto, y nan ta spera cu e buki di cartoon aki lo inspira hopi persona pa nan ta mas conciente riba e consumo di plastico.

   Ya ta na benta: Plastica’s Revenge!  El a wordo concebi, pinta, y skirbi pa tur e alumnonan cu a participa den e proyecto “Deplastify the Planet”.