Docente Hilary Gibbs a representa Aruba pa participa na un Feria Multicultural na Merca

E ta un ex-Miss y ex-presentadora di TV na Aruba

ORANJSTAD (AAN): E tabata un cara basta conoci na Aruba, specialmente esnan cu tabata mire ta presentador na Telearuba, dunando asistencia na e.o. programanan di TV di Ivo Yanez, y mucho mas.  E tabata fungi como MC na diferente actividad riba e isla aki.

   Prome cu esey el a competi den Aruba Model Search na 2012, y tambe pa Miss Teen Aruba International 2015, unda cu despues el a haya chens pa bay representa Aruba na certamen di Miss Teen Americas 2026 na El Salvador, unda el a sali na di 4to lugar entre e 35 paisnan presente.  El a gana e tempo aya e premio di ‘Best Smile’ y varios mas.

   Ta trata aki di Hilary Gibbs kende despues di esaki a bay biba na Merca, y a bay traha como docente den tereno di ‘Educacion Special’ na Stafford County na estado di Virginia.  E ta duna les na FerryFarm Elementary School na ciudad di Fredericksburg na Virginia.

   Cada aña, tin un Feria Multicultural organiza pa Stafford County, y Hilary a indica cu como un Arubiano orguyoso, el a representa su isla na e Feria Multicultural aki.

   “Como educador den e field di special education, mi a participa pa di dos biaha pa representa Aruba,” ta loke Hilary a indica den un entrevista cu DIARIO.  “Pa ami ta un orguyo representa Aruba y informa tur e studiante- y mayornan di e condado di Stafford na Virginia, encuanto e isla di Aruba.”

   El a mustra tur bishitante na e Feria Multicultural, tur loke Aruba tin pa ofrece, y a hasta pone su mesun storia di participacion den Miss Teen Aruba International 2015.

   “FerryFarm Elementary School a dunami e oportunidad di pone Aruba su nomber na halto no solamente pa atrae mas turista pero tambe pa informa y conscientiza futuro bishitante nan di nos isla. Personanan cu porta no tabatin un idea di unda nos bunita isla ta situa den e mapa of porta no tabata sa cu Aruba ta fit 92 biaha den Hawaii.”

   Hilary a sigui bisa: “Un isla hopi chikito cu hende na cu un curason inmenso y talentonan increibel, manera Xander Bogaerts, Jeon, Sarah-Quita. Aruba tin hopi pa ofrece y ami manera un Arubiano bibando den exterior ta un deber di sigui pone Aruba na halto.”

   Su mesa na e Feria a wordo decora cu bandera di Aruba, cu varios stickers souvenirs di e isla riba dje, y dos baki di Pastechi di Keshi Hulandes cu e mes a traha.  Hilary mes tabata bisti cu un polo shirt grandi di San Nicolas.  Su yiu homber chikito tambe tabatin uno bisti, y un Bluetooth speaker chikito riba mesa tabata tocando cancionnan di Padu del Caribe constantemente. 

   DIARIO a puntra si e mes a traha e Pastechinan.  “Mi a traha aproximadamente 50 Pastechi. Algo cu mi a enjoy masha hopi mes, desde e preparacion di e mansa pa culmina cu e reyeno di keshi gouda. Un Pastechi cu a keda cu e textura y sabor perfecto.

   El a representa FerryFarm Elementary School, y principalmente Aruba na e Feria Multicultural aki cu a lage contento y satisfecho cu tur reaccion ricibi di e bishitantenan.