Docente di scol ta gozando di su pensiun den su cunucu cu yen cosecha

ORANJESTAD (AAN): Den fin di siman, DIARIO a bishita e Cunuco di Pedro Tromp, ex-docente di scol y awor cu su pensiun ta gozando di su cunucu.

   E ta yama e lugar aki na Tanki Flip, como “Cunucu di Pedjol”, y e dianan aki ta cosechando monton di pinda.  Ademas e tin plantacion nobo cu lo ta cla pa seis siman.  Tambe tin otro seccion di pinda cu ta cla aki 2 siman.  Tin un otro seccion di pinda cu ta cla aki 8 siman.

   El a mustra tambe un pida di cunucu unda su casa ta planta.  E ta yena cu mata di fruta, y por a mira bacoba a cuminza hecha, y tambe rooibiet.

   Pedro a indica cu den su cunucu tambe e tin pida plantacion cu Yambo, pero e ta chikito y esey ta yega net pa su mesun famia por come.  Mas pariba e tin boonchi planta.

   El a splica na DIARIO cu e cosechanan di Januari te cu awor Augustus, a bin di e hecho cu aña pasa a dal algun bon awacero y e dam di Tanki Flip a capta basta awa.  Cu esey di aña pasa te cu awor por a planta cu awa di dam.

   Tromp ta spera cu e aña aki por tin yobida atrobe.  Si acaso esey no logra, e lo bay aplica pa e meter special di WEB Aruba NV di 5,50 pa e por sigui planta pa pueblo come saludable.

   Pedro Tromp a mustra cu nan calculo pa cu planta pinda, y ki ora tin di cosecha esaki ta facil.   Si e planta pinda awe Dialuna 16 di Augustus, e ta conta 3 luna, pues e ta bay saca pinda te dia 16 di November.  Corda cu e pinda aki ta crece bao tera, pues tin di keda corda e fecha cu a planta.

   Y bo no ta djis planta e mata, basha tiki awa y bay lage asina!  Mata di pinda ta exigi mantenimento y bo tin di chapi rond di e mata di pinda por lo menos 3 biaha, pasobra yerba ta crece na gran cantidad.  Bo tin di tene limpi, sino yerba ta domina e pinda.  Si acaso yerba domina e pinda, lo bo no haya bon cosecha.  Hecho ta cu e mata di pinda tin di ‘habri’ pa asina e ‘drumi y e staca su clabonan den tera, y esey ta bira pinda.

   Segun Tromp a splica, ora di saca pinda, ta saca e mata tambe cune.  Pasobra pa pone mata bek, e ta un trabao masha grandi mes.   E ta haya simiña di pinda na Supermarket of tambe na Santa Rosa.

   E tin di prepara e tereno bek prome cu e bolbe planta piña.  E tin un machine di ploeg cu cual e ta ‘are’ e tereno e mes.   E no ta usa machine mas di Santa Rosa pa haci esey, como cu e blade no ta wordo haci suficiente limpi, pasobra e por trece contaminacion di otro ‘yerba’ den su cunucu, y esey ta indeseable.

   Prome cu e planta, e ta percura pa usa mest local di e.o. Mark Perez di Washington, cu tin bon mest di cabrito, y tambe tin algun amigo cu tin bon mest di baca, burico, y cabrito mezcla cu ta bon mes.

   Ora cu e planta un seccion, e ta haci esey den matanan den 6 rij of 8 rij.  Esey e ta haci den un dia, pues cuminza pasa cu machine, y planta nan.  Mainta ta e so ta den cunucu.  Si acaso e planta atardi, su señora ta dune un man e ora.  E tin slangnan di drip-system instala cu ta facilita e pasamento di awa pa muha e matanan.

   Na momento di cosecha, e ta haya yudanza di algun pensionado amigo, kendenan cu hopi placer ta bin duna un man.  Un di e pensionadonan ey tambe ta ex-docente di scol.

   Mayoria di su cosecha ta pinda debi cu esey ta loke mas hende ta pidi pe, pero toch e tin boonchi tambe, y tin di tene cuenta cu ora e caba di planta pinda un caminda, e siguiente biaha e ta planta boonchi riba dje, pa evita di satura e tera.

   “Si bo keda pone mesun cultivo cada biaha mesun caminda, bo ta daña e tera fertil,” Pedro a indica na DIARIO.  Pesey e ta haci un ‘rotacion’ di tipo di planta cu e ta pone cada biaha riba areanan di su cunucu.

   E tin un tubo ta core for di su cunucu ta bay te na e dam di Tanki Flip.  Cu e pomp e ta saca awa di dam y muha e matanan.

   Segun Pedro, su tereno falta solamente 100 meter cuadra pa el a yega 1 bender.  Pues su cunucu ta 9.900 meter cuadra.

   E trabao ta facil?  Segun Pedro, e ta un trabao cu si bo guste so, lo bo bay cune.  Si bo no gusta trabao di traha cu mata, tera, ploeg tereno, of traha cu mest, e ora mihor bo laga para.  “Pasobra lo bo keda na mitar caminda,” el a bisa.

   Pedro a indica, di edad hoben caba e tabata planta hunto cu su defunto tata, y nan mester a carga awa di regenbak cu un bleki di 5 gallon, pa muha mata.  Y ora nan regenbak bira bashi, e tabata bay na esun di su omo cu ta biba como 500 meter mas leu, pa asina recoge awa y carga nan den bleki di 5 gallon.

   E tabata pone e bleki aki riba garetia di palo cu wiel di hero.  E cu su ruman homber (actual propietario di Botica Santa Anna) tabata lastra e garetia bin te na e cunucu y e ora cu un bleki chikito ta schep di e bleki y pasa muha di mata-pa-mata.

   Y esey ta loke nan como hoben mester a haci.  “E tabata orden di e bieu, pasobra ora e yega cas e prome cos cu e haci tabata pa wak si e matanan ta muha,” el a bisa.

   Asina e hoben tabata costumbra, y bo mes ta come di loke bo a planta di chikito.

   DIARIO a nota cu Pedro Tromp tin un pasion enorme pa e trabao aki, y pesey un palabra di pabien cu e bunita cosechanan aki, y danki na e entrevista.