*Nan ta wordo contagia door di nos mes comunidad - ORANJESTAD (AAN) – Durante e conferencia di prensa di update pa locual ta Covid-19,
den su di cuater ola aworaki, unda variante Delta ta domina, CEO di ATA Ronella Croes a duna un relato basta amplio, manera por a lesa den DIARIO su edicion di Diasabra ultimo.
Ronella Croes a referi tambe na loke ta contagio bao di turistanan cu ta bin Aruba. El a duna e siguiente cifranan di turistanan cu a test positivo na Aruba, entre Mei y Augustus awo.
Me: 48, Juni: 124, 24, Juli na Juni: y Augustus 82 apenas den e 12 dianan di e luna aki.
“Tur hende sa cu nos a cambia e maneho di entrada pa Aruba, pues tin mas control di cien porciento test for di e paisnan di riesgo, pero por mira toch, cu tambe e turistanan ta wordo afecta pa e variante Delta y pa e contagio. Y mester remarca cu bao e turistanan ta hopi hoben ta test positivo; y tambe, nan ta test ora di salida, kiermen nan ta test tambe ora ta regresa nan pais. Pues, ta cosnan cu nos mester para keto na dje, cu bo ta bin Aruba, bo ta disfruta di bo vacacion, y bo ta pega akinan, probablemente, cu e virus, algo cu no ta na su lugar”, Ronella Croes, CEO di ATA a subraya.
El a sigui splica cu considerando e cantidad di turistanan, ta na su lugar pa conclui cu e mayoria di e casonan no ta bao nos bishitantenan sino bao di nos mes comunidad.
“Bo por argumenta te hasta cu door cu nos bishitantenan ta test positivo, gran mayoria di nan ora di sali, cu nan ta wordo infecta door di nos mesun contagio bao di nos mes”, CEO di ATA a reitera.
El a remarca cu esaki ta algo cu mester su atencion. “Nos ta goza di hopi renombre pa e strategia cu Aruba a aplica pa cu maneho di e virus, y esaki ta cay hopi bon bao nos socionan. Nos ta use, logicamente, y nos ta bin ta use pa pusha e recuperacion economico, pero mester mas, pasobra, obviamente, nos a faya den e contexto aki tambe y e ta afectando nos recuperacion. “Y e solucion ta, tur hende a bise caba, Vacuna!” Croes a remarca.
Pa conclui, Ronella Croes a bisa cu for di e sector comercial cu cual hopi dialogo ta tumando lugar, nos ta hopi gradici pa nan input y participacion. No por generaliza cu nan tur ta mustra cierto comportacion cu no ta den linea di locual nos ta spera; pasobra tin hopi tambe cu ta sigui y cu kier haci esfuerzo pa ta parti di e solucion. Y nos ta spera cu ta bay hopi bin mas enfoke tocante vacunacion”, el a enfatiza.
Croes a bisa cu mester pensa aki riba bienestar general, pues e “algemene belang” tin cu bay dilanti, no solamente for di e contexto di salud sino ademas, for di contexto economico pa bo y bo famia tambe.
