Disturbio a azota Republica Dominicana cu awacero lagando por lo menos 13 morto atras

SANTO DOMINGO: Por lo menos 13 persona a fayece na Republica Dominicana, di cual ocho a fayece ora cu un muraya di e infrastructura di Avenida 27 de Febrero na e capital a basha bin abao.

   Cinco otro hende a fayece ora cu nan a wordo lastra door di Rio Manoguayabo na e capital, incluyendo un mucha.  Na Barahona tambe tin un persona perdi, pues nan no sa nada di dje.

   Te cu Diadomingo merdia, tin indicacion cu 1.500 famia a wordo afecta pa nan casnan cu a keda destrui debi na yobida, y tambe deslizamento di tera.  Y esey ta exactamente loke National Hurricane Center a adverti riba Diabierna.  Nan a indica cu aunke Disturbio #22 lo no haya mas forza y bira un Depresion Tropical ni Tormenta Tropical, toch e lo azota e.o. Haiti y Republica Dominicana cu yobida torencial cu por ocasiona deslizamento di tera.

   E muraya di Avenida 27 de Febrero no por a wanta e peso mas, y a cay riba varios auto cu tabata coriendo riba dje.  Autoridadnan di rescate a traha te Diadomingo marduga pa sigui saca victima di e autonan.  Tambe a cera e pida caminda aki pa trafico no pasa riba dje.

   President Luis Abinader a core yama un reunion urgente di Gobierno, y a emiti dos decreto pa por yuda ciudadanonan despues di e impacto di e fenomeno atmosferico aki.  Esaki a encera cu a cera tur oficina di trabao di Gobierno cu normal lo tabata habri Diasabra y Diadomingo.

   Alerta a wordo emiti pa 30 di e 32 provincianan di e pais, di cual 13 di nan ta na Alerta Cora, 12 na Alerta Geel, y cinco na Alerta Berde pa posible subimento di nivel di rieu y rooinan.

   Tambe mester a yuda evacua miles di hende cu mester a laga nan cas cu a sufri di daño inmenso cu perdida di nan pertenencianan y infrastructura cu a wordo debilita.