Comemento saludabel  ta e reto mas grandi di mayoria hende na Aruba

Coördinator POH na Wit Gele Kruis ta alerta:

ORANJESTAD (AAN):   Segun Jasmira Mora Garces, Coördinator POH na Wit Gele Kruis Aruba e parti di comemento ta e reto mas grandi di mayoria hende na Aruba cu no ta tene esaki na cuenta.

            El a indica cu comemento ta keda hopi importante. Entre 75 pa 80 porciento ta bin di cuminda y si no tin esey den un bon balans, hopi facil e ta bay haci c'un persona lo por haya un of otro malesa cardiovascular of di diabetes.

            Banda die esaki tin e parti cu ta hereditario. Tin hopi hende na Aruba caba cu tin diabetes y hopi biaha e familiarnan cercano no sa mes. Esaki ta algo grave pasobra mester busca pa sa si tata of mama tin sucu of no y kico abo por haci pa evita esey, Mora Garces a remarca.

            El a sigui bisa cu hopi hende no ta para keto na e beneficio cu bebemento di awa ta trece cu ne. Esey ta algo cu ta purbando via di e consultanan di POH, pero tambe den lesnan of presentacionnan cu nan ta duna, entre otro na scol.

            A ripara hopi entusiasmo cerca e juffrouwnan di scol y cerca e muchanan mes. Pesey e aña aki a dicidi pa haci mesun cos pasobra for di chikito ta cuminsa siña nan kico ta e balor di awa.

            "Mas chikito nos cuminsa siña nan kico kiermen come balansa y pa evita e tipo di malesanan aki, mi ta kere ta bay tin mas ganashi in the long run. Pesey nos como POH, hunto cu FDA, y nos tin Lions cu ta bezig ta support nos, nos a dicidi di sigui cu e iniciativa aki", a indica.

            Esaki ta e di dos aña cu ta bezig cu e muchanan. Aña pasa a bay Tra'imerdia, pero a ripara cu na Tra'imerdia e muchanan ta mas activo caba y e atencion na e les. Pesey e aña aki a dicidi cu ta haci'e durante di dia na scolnan basico.

            Tin 13 scol den plan cual ta basta hopi pa haci den un siman, pero e meta ta e conscientisacion pa cu hiba un bida mas saludabel y tambe pa evita cu ta haya diabetes, Mora Garces a duna di conoce.