Magaly Brito di SEPPA:
ORANJESTAD (AAN): Na e momentonan aki tin discusionnan andando den sector publico cu gobierno ariba e tema di ahustacion di salario debi na e aumento di costo di bida, esta indexering. Asina Magaly Brito di Sindicato SEPPA a duna di conoce.
El a indica cu ya a pasa e fase unda tabatin intercambio y informacion pa sigura cu tur hende tin e mesun informacion. Aworaki ta bay over na e posicionnan cu cada un di e gruponan cu ta na mesa y gobierno pa asina por wak con mas lihe cu ta posibel por yena na un acuerdo.
E di dos punto cu nan a trece dilanti ta e rumornan cu tin constantemente y tabata tin un declaracion tambe di gobierno caminda cu nan ta bay riba e tema di e premienan y cu nan tabata bisa cu pa 2024 esakinan ta stop, a bisa.
A pidi gobierno pa pone su posicion por escrito pa asina por informa tur esnan cu ta gosa di e tres premienan aki y pa por sali na defende e premienan aki y e derecho di e trahadonan cu tin e premienan aki, Brito a indica.
El a bisa cu a keda di haya esaki por escrito. A compronde cu Prome Minister lo tabata den comunicacion cu e vocero di sindicatonan di sector publico caminda cu a bisa cu lo haya esaki por escrito y cu e tema aki lo wordo aclarea dunando e impresion cu ta duna e sindicatonan rason, esta cu no por bay kita e tres premienan aki entrante januari 2025.
Tempo cu e discusionnan tabata na mesa a palabra cu na januari 2024 e ta stop di crece, pero no cu e derecho aki ta bay perdi, a agrega.
Brito a sigui bisa cu esey ta un otro tema cu nan ta trahando riba dje.
Un otro tema cu nan ta bezig cu ne cu gobierno ta e tema di dialogo tripartiet social-laboral na unda intencion di gobierno ta pa bin cu diferente topico, entre nan temanan cu ta para den Landspakket. E meta ta pa busca manera pa yega na un acuerdo a base di un dialogo social y wak si por trece cambio entre otro, riba e tema di flexibilisacion di leynan laboral.
