Ronella Croes, CEO di ATA:
ORANJESTAD (AAN): CEO di ATA, Ronella Croes, tocante e puntonan di atencion cu el a menciona prome, den e entrevista aki cu DIARIO, el a sigui splica cu no menos importante, pero hopi importante ta cu ATA tin e papel pa e ta e voz di turismo, den diferente organizacion, comision, maneho y e maneho nacional cu e ta aconseha riba dje, sea re-activamente of pro-activamente.
“Y parti di esaki ta cu nos mester ta na mesa cu cifras y hechos. Anto kico nos ta haci hopi? Bo ta wak un ATA cu ta bon hopi dilanti cu investigacionnan cu ta wordo haci. Aworaki nos ta finalizando update di e estudio di capacidad di carga; un topico bastante importante cu ta toca e aspecto laboral, pero tambe hopi mas punto.
E parti cu nos ta bezig update ta cu nos ta trahando diferente blachi unda cu nos ta pone kico ta e cantidad di cambernan adicional cu Aruba por spera, y pa ki periodo.
For di e modelo, e ora ey, nos ta saca kico ta e entrada proyecta pa Pais Aruba, pues e impacto economico pero di otro banda tambe, kico ta e costo cu ta bay mara cu cada desaroyo. Por pensa aki riba e costo social, pero costo di desperdicio cu ta adicional, naturalmente, na e desaroyonan aki, pero por pensa e ora ey riba costonan laboral”, CEO di ATA a splica.
Esaki ta cosnan cu ATA ta trece dilanti y cu tin proyecta cu nan ta cla pa Maart, anto nan ta bin dilanti pa tur hende cu mester tuma decisionnan tambe mester ta bon ekipa. “Y nos tur ta trahando a base di cifranan concreto. Pues esey ta otro papel cu ATA ta hunga den e totalidad di aspecto laboral pero den e caso aki e aspecto mas amplio ta e topico di capacidad di carga y hecho ta cu nos tin e realidad ta cu ta bin mas acomodacion y nos papel e ora ey ta pa mitiga impactonan cu nos no ta desea, y pa stimula di otro banda, accionnan, decisionnan y inversionnan cu ta yuda dirigi esaki di e miho manera posible. Na final di dia Turismo lo keda e pilar, no solamente economico, pero e pilar di nos bienestar, anto nos mester tey pa salvaguardia esaki considerando realidadnan cu nos tin cu nos tin cu maneha awo, miho den pasado”, CEO di ATA, Ronella Croes a señala.
