Disciplina y dedicacion di Scouting Aruba ta refleha precisamente loke nos pais tin mester

Prome Minister Mike Eman:

• Un capitulo nobo den liderazgo pa Scouting Aruba 

ORANJESTAD (AAN): Den un ambiente yen di orguyo na Parke Wilhelmina, Scouting Aruba a celebra un momento importante. E ceremonia oficial di instalacion di su Hoofdcommissaris y Hoofdbestuur nobo pa e periodo 2026-2029.  Prome Minister di Aruba, mr. Mike Eman tabata invita p’e ocacion aki y su presencia a duna e ceremonia un caracter special. Tur partisipante a tuma nan posicion den un forma di U, creando un ambiente formal pero caluroso.

   Despues di un discurso di bon bini di e Presidente di e Comite Nacional, Akela Sharlyn Farro, e ceremonia a cuminsa oficialmente cu un oracion pa pidi bendicion y guia den e proceso importante cu lo sigui. E momento crucial di e atardi a yega ora cu Dave Martinus a wordo yama dilanti. Den presencia di Prome Minister, Martinus a confirma su compromiso pa acepta e responsabilidad como Hoofdcommissaris di Scouting Aruba pa e proximo periodo. Awor Dave Martinus cu orguyo y determinacion a expresa su promesa di scout como lider, simbolisando su dedicacion pa dirigi e organizacion cu integridad y vision.

   Durante e ceremonia, Daver Martinus a bisti e simbolonan di su posicion, su dashi, lint y baret marcando oficialmente su rol como lider principal di Scouting Aruba. A completa e monento aki cu un saludo ceremonial, reflehando respet y union entre tur presente.

   Despues di e ceremonia e Hoofdcommissaris nobo a hiba palabra y instala e miembronan di su Hoofdbestuur. Un tras di otro, lidernan a sali dilanti pa acepta nan rol y responsabilidad, cada un reafirmando nan compromiso cu e balornan di scouting door di ripiti e promesa di scout.

E instalacion di e Hoofdbestuur a resalta e forsa di trabao den ekipo, liderazgo comparti y e mision comun pa sigui forma hobennan den ciudadanonan responsabel y comprometi.

   Den un discurso yen di inspiracion, prome minister Mike Eman a comparti un mensahe profundo rib’e balornan cu ta forma nos sociedad. Su palabranan a resona fuerte, specialmente ora nos mira e rol importante cu Scouting Aruba ta hunga den desaroyo di nos hobennan y lidernan.

   “Scouting Aruba ta algo cu nos mester tene na halto,” Mike Eman a bisa, enfatisando e respeto pa regla, fidelidad na palabra di Señor, amor pa nos pais y responsabilidad pa cuida nos prohimo. Segun Eman, esaki no ta simplemente e ideanan, pero e principionan cu tin di biba tur dia den nos comunidad.

E trabao di Scouting Aruba, cu hopi disciplina y dedicacion, ta refleha precisamente loke nos pais tin mester awe mas cu nunca. Un sociedad unda nos ta mira otro, sinti otro y preocupa pa otro. E balornan aki stima pa nos pais, amor pa nos prohimo y fe den nos Creador ta keda planta den curason di cada miembro, di chikito te grandi.

   “Cu un sentido grandi di orguyo y satisfaccion, nos ta mira con hobennan y lidernan ta sigui carga e responsabilidad aki pa contribui na un Aruba mas miho. Un pais unda union, calor humano y respet pa otro ta na e centro di nos bida diario.” Prome minister mr. Mike Eman a termina su mensahe cu gratitud pa tur e lidernan cu ta dedica nan mes na guia e generacion nobo. “Dios bendiciona boso, y laga nos sigui mira mas lider surgi, inspirando nos hobennan pa bira ciudadanonan cu ta haci diferencia.”

   E anochi a sigui cu un ceremonia simbolico y profundo: E ponemento di krans y ripiticion di e promesa di scout, den conmemoracion di Dia di St. Joris un simbolo di curashi, servicio y fe pa scoutnan rond mundo. E acto a culmina cu un momento simbolico di cende un kampvuur, caminda diferente generacion di scout di bever te na explorado a uni nan bos den e promesa cu ta conecta pasado, presente y futuro.

E evento aki no solamente a marca un cambio di liderazgo, pero tambe un renobacion di compromiso cu e idealnan di scouting. Cu speranza y determinacion, Scouting Aruba ta mira padilanti pa un futuro caminda liderazgo, servicio y desaroyo personal ta keda central den tur su accionnan.