Directora di UNICEF Hulanda ta duna compliment di e trabounan cu e team di Codigo di Proteccion di Departamento di Mucha y Hoben a haci

ORANJESTAD (AAN):  Recientemente representante di Departamento di Mucha y Hoben, Sue-Ann Ras hunto cu directora di UNICEF di Hulanda, Suzanne Laszlo y Anna Kroon,

Senior Specialist Kinderrechten Cariben, a reuni cu Minister Rocco Tjon, unda a elabora riba algun punto importante, relaciona cu e MoU firma dia 22 di februari 2022 y tin un duracion te 31 december 2025.   

Colaboracion Actual cu Ministerio

            Directora di UNICEF a duna compliment na Minister y e team cu ta encarga cu implementacion di Codigo di Proteccion, riba e tremendo progreso y desaroyo desde inicio y a resalta e pasion y determinacion cu e team aki tin relaciona cu e tema; abuso di mucha. Minister na su lugar a puntra si tin posibilidad pa extende e MoU y segun directora Laszlo cu esaki ta poco trempan pa tuma decision riba dje y ta depende tambe di e disponibilidad di fondo na e momento ey. Pa awor e plannan t’ey pa loke ta sigui duna sosten tecnico pa e siguiente pasonan di Codigo di Proteccion. 

Desaroya un “Toolkit” y Revista Digital contextualisa

            For di 2022 a ranca sali cu un plan di accion relaciona cu e fondonan cu Aruba a haya for di Union Europeo pa algun proyecto bou auspicio di UNICEF Hulanda. Pa loke ta trata e parti di fondo y trabou di Codigo di Proteccion, por bisa cu e trabounan ta kedando cla.

Pa garantisa continuacion como tambe durabilidad relaciona cu e decreto nacional Codigo di Proteccion den e casonan di (sospecho di) abuso di mucha na Aruba, tin un grupo di profesional den e 4 sectornan: social, husticia, enseñansa y salud cu a traha riba e contenido di un Toolkit Digital Codigo di Proteccion (CdP). E meta di e Toolkit Digital CdP aki ta, pa tur e profesionalnan den e 4 sectornan por educa y informa nan mes riba diferente tema relaciona cu abuso/maltrato di mucha.

            E grupo meta ta e profesionalnan cu ta traha cu of pa mucha na Aruba y ta traha cu Codigo di Proteccion. E prome version di concepto di e ‘Toolkit’ ta cla y actualmente ta trahando riba e traduccion y algun detaye relaciona cu e contenido y idioma. E desaroyo di e ‘Toolkit’ como tambe e revista digital ta den colaboracion y partnership estrecho cu Augeo Foundation y Departamento di Mucha y Hoben (DMH). A haci uzo di nos profesionalnan local pa crea henter e contenido, incluyendo topico, escritor y potret of video. Tur esaki ta pa brinda sosten profesional na e propio profesionalnan den veld, na momento cu nan mester traha y anda cu Codigo di Proteccion como parti di nan maneho diario.

            UNICEF ta vigila e proceso di desaroyo di Toolkit y Revista digital hopi di cerca, mirando cu nan a contribui pa Aruba yega na e fondonan necesario via di Union Europeo y Postcode Lotterij, pa ehecuta e productonan aki pa engrandece e conscientisacion y comparti conocemento profesional.