Minister Xiomara Maduro: Aruba a briya un biaha mas riba caya
ORANJESTAD (AAN): Carnaval 69 a yega su fin diadomingo ultimo cu e grandioso parada di Carnaval 69 y e kimamento di Momo. Minister di Cultura Xiomara Maduro ta haci uso di e oportunidad pa yama danki na tur esnan cu a yuda engrandece nos Carnaval 69.
E mandatario encarga cu cultura ta gradici SMAC, bou liderazgo di su Presidente Darren van Ommeren y su ekipo di voluntario. Gradicimento special na tur Reina, Rey, Prins, Pancho den tur categoria y festival, grupo-, musico- y participantenan pa un bunita y exitoso Carnaval 69. Como tambe ta gradici tur esnan cu tambe ta haci e celebracion grandi aki di nos cultura posibel manera e.o. Cuerpo Policial, ImSan, Ambulance, EMS, Serlimar, DOW, DTI, DIP, Brandweer, Prensa, cosedo-, diseñador-, estilista-, welderdo, chauffeur-, comercio, voluntarionan y tur otro instancia y persona cu pa medio di nan trabou y esfuerso a yuda engrandece Carnaval di Aruba.
Aruba un biaha mas a demostra cu su Carnaval ta e exposicion cultural mas grandi y bunita di nos Pais, un temporada caminda nos Pueblo y bishitantenan a gosa, celebra y biba nos cultura. Carnaval 69 ta keda como un bunita recuerdo pa nos historia, un biaha mas masha danki na un y tur. Nos lo topa bek den otro temporada di Carnaval den aña 2024, na unda Aruba lo celebra su Carnaval 70 den tur su buniteza, creatividad y ambiente.
Pabien y danki Aruba.
