ORANJESTAD (AAN) – Directora di SKOA, señora Anuesca Baly, ta satisfecho cu resultadonan di e aña escolar aki,
pero e ta kere cu semper por ta mas satisfecho, pasobra nan ta busca semper pa ta hopi miho. Asina el a declara den entrevista cu Matutino DIARIO.
Di e resultadonan di e cinco scolnan MAVO, e grupo cu mas a resalta e aña aki tur a haci nan best, pero na Colegio San Antonio e resultado ta 92%.
Na di dos lugar tin Santa Filomena cu 85% pero e por subi ya cu tin un alumno cu pa motibo fuera di su alcance tin cu haci e di tres tanda di herexamen, cu aprobacion di Examen Buro.
Maria College tin un bunita resultado tambe, di 82%. La Salle College tin un porcentahe di 85%, y Colegio San Agustin cu 70%.
Señora Baly a expresa cu SKOA ta conforme, pero semper ta nan deseo pa tur alumno haal nan diploma.
“Pasobra con cu bay bin ora un alumno tin su diploma, e ta e prome stap pa e por sigui cu su carera sea si ta di MAVO e por bay Colegio EPI, of e por bay HAVO, anto e ora ey e ta bon p’e”, señora Baly a indica.
Tambe tin di e alumnonan cu ta bay na e sector laboral caba loke tambe ta bon, y ora ey nan tin un papel den nan man pa nan prome stap.
“E ta duna nos semper un satisfaccion ora cu nos alumnonan ta score bon y ta sigui hopi miho den e carera cu nan a pone nan dilanti”, directora di SKOA a expresa.
