Minister Wendrick Cicilia ta duna di conoce:
ORANJESTAD (AAN)—Minister di Turismo, Transporte y Labor, señor Wendrick Cicilia, a bolbe referi, den entrevista cu Matutino DIARIO, na e situacion di Servicio Meteorologico di Aruba, cu e ta consider’e un Instituto hopi vital.
E dignatario a remarca cu Meteo ta un Instituto hopi vital no solamente den sentido di maneha diferente informacion importante pa aviacion, pero tambe pa loke ta trata e situacion di tempo maritimo pero tambe local.
“Y den e cuadro aki, locual cu nos por bisa ta, cu departamento aki ta enfrenta hopi reto y cu a wordo neglisha pa hopi aña”, Cicilia a bisa.
Den e cuadro aki e minister a duna un actualizacion riba loke a sosode durante e ultimo dianan transcuri.
“Nos a duna un extension na e director actual di Meteo, señor Barkmeyer, pa cumpli cu e normanan internacional cu Instituto Meteorologico tin estableci na Aruba.
“Locual mi por bisa ta cu na e momentonan aki e departamento ta bao di hopi presion, debi na falta di personal y di material, y tambe di un ambiente laboral agradabel pa e diferente empleadonan. Locual ta otro aspecto di preocupacion, pa varios di nan, ta nan posicion legal (rechtspositie). Nan a acumula mas cu cien dia di vacancy, pa motibo cu tin un scarcedad di personal cu nan no por disfruta esakinan” segun e mandatario.
Minister Cicilia a subraya cu esaki no ta circumstancianan normal. “Nos ta buscando diferente posibilidad; nos a hiba combersacion cu ANSA, cu Triple A, y cu Departamento Meteorologico mes, con nos por acerca y maneha miho, e problematica aki. Otro siman, netamente, nos tin un reunion planea cu SEPPA, cu representantenan di empleadonan, pa nos por sinta discuti tur e temanan aki, cu ta hopi importante pa trece trankilidad na e momentonan aki, y a extende e contract di e director actual, loke ta nifica cu e ta bay keda pa un periodo di seis luna mas, p’asina e por guia e proceso tambe di profesionaliza y mehora e aspecto operacional di Departamento Meteorologico”, Minister Wendrick Cicilia a remarca.
Esaki a wordo pasa caba den Ministerraad y a haya aprobacion. Ya caba e Instituto di Meteorologico ta cumpli cu normanan internacional y ta supervisa e parti operacional y tambe maneha e informacionnan vital y importante di nivel maritimo y aviacion, ademas tocante awaceronan teritorial, y diferente señalamentonan di mal tempo.
“Mas cu claro e ta un organizacion cu conforme structura manera ta determina, pa dia mester tin alrededor di binti hende, pero na e momentonan aki e ta opera cu solamente 7 pa 8 hende. Bo ta mira cu tin un scarcedad di mas cu 50% di personal. Pero si mester tin cierto funcionnan unda tin personanan clave pa por suministra informacion y no keda un bashi di esaki”, e mandatario a señala y a reitera cu p’esey tambe a haci extension di e contrato di e director p’asina por sigui mantene e operacion basico di Departamento Meteorologico.
