ORANJESTAD (AAN) – Directora di DTI (Dienst Technische Inspectie), Richella Dorothal, como miembro di e Comision di Vuurwerk pa basta aña caba,
a menciona den entrevista cu DIARIO cu den cuadro di esaki, durante e reunionnan di e comision, nan ta prefera di haci cierto palabracionnan y ora cu e controlnan tin cu tuma lugar na fin di aña, nan tin e personal necesario cu e planning for di aworaki, pa e personal por ta presente pa bay haci e inspeccionnan aki tambe.
Locual nan a bin cune nobo, como tres aña pasa, ta cu si nan ta bay haci uso di un tipo di container, esaki mester tin e aprobacion di parti di Electro di Coriente, mester a haya control door di un installateur conoci di DTI, pa haci e trabao aki. Pues, a base di esaki Dorothal kier a informa esnan cu ta nobo, cu nan mester cuminza cu e proceso aki adelanta caba, pa ora e clapchinan ta yega por tin tur cos in place tambe.
Esaki ta necesario, Dorothal a splica, pasobra hopi biaha nan ta uza coriente den e container, y tambe pa e parti di pago cu nan ta uza machine di banco. El a agrega, pa loke ta trata e lugarnan di benta di clapchi, cu e Comision ta tene cuenta cu e distancia entre un localidad y otro; nan ta controla e parti di seguridad den esaki tambe.
Richella Dorothal a indica cu un bez cu e Comision tin concreto cuanto localidadnan di benta tin y na unda nan ta ubica, nan ta prepara e grupo cu ta bay atende cu esakinan, y generalmente ta e fechanan 27, 28, 29, 30 y 31 di December, cu ta fechanan cu hopi biaha e departamentonan di gobierno ta cera, y pa e motibo ey nan ta zorg pa tin e personal cu lo atende, y nan ta haci tambe e peticion na e trahadornan cu ya pa añanan ta haci’e, y esnan cu kier join extra e Comision ta acerca nan tambe pa esaki. Nan ta zorg pa tin e gruponan accesible. Nan ta parti e gruponan di dos of cuater, den diferente distrito y localidadnan, depende di con e gruponan ta wordo parti.
