Minister Glenbert Croes:
*Lo identifica e areanan na unda lo por cuminsa explora
*Meta ta pa inicia boramento na Januari 2024
ORANJESTAD (AAN): Durante conferencia di prensa di Gobierno di Aruba, Minister di Energia Glenbert Croes a elabora riba e compania Armstrong Oil and Gas Inc., cu a firma e MOU cu e Compania Arubano di Petroleo.
Armstrong ta un compania priva cu ta basa na Denver, Colorado y ta specialisa den explora petroleo y gas. Un total di 2.5 biyon di bari di petroleo, a wordo descubri pa Armstrong Oil and Gas Inc, na e campo Pikka situa na Alaska. Otro lugarnan na unda e compania aki a explora den Merca, ta na Alaska, North Dakota, Louisiana, California, Michigan, Wyoming, Texas y Utah.
Minister Croes a splica cu e meta di e MOU ta pa evalua e potencial di hibrocarburonan den area maritimo di Aruba.
Ya a cuminsa cu e transicion di energia, na unda Gobierno ta invirtiendo den energia renobabel cu proyectonan di Eagle LNG, Acciona Energia, expansion di Parke di molina di biento na Rincon, y lo bin mas parke solar.
Ta importante pa enfatisa cu tanten cu energia renobabel no por suminsitra 100% di e demanda, fossil fuels ta keda necesario ainda.
E ta sigur un bon noticia pa Aruba, cu un biaha mas tin un compania interesa pa explora e posibilidad di adkiri hibrocarburonan den e area maritimo.
Actualmente, cu e MOU firma, Armstrong lo sinta cu Arubano Petroleo pa analisa y identifica e areanan na unda lo por cuminsa explora, y unabes e areanan aki ta identifica, lo cuminsa bora na Januari 2024.
"Como Minister di Energia, mi ta sumamente contento cu compania Arubano Petroleo y Armstrong International a yega na un acuerdo pa cuminsa cana e caminda pa studia e posibilidadnan pa explora gas of petroleo den e areanan di Aruba.
Mirando e calidad, capacidad, y integridad di e compania Armstrong, Aruba ta keda positivo cu e biaha aki nos lo logra, y cu e rikesa di e logro aki bay pa henter comunidad, cambiando asina positivamente, e destino di pais Aruba" Minister Croes a expresa.
