Directora di DIMP ta splica kico ta “handelsgoederen” den e concepto di Ley

*E kiermen productonan importa pa wordo re-bendi

ORANJESTAD (AAN) -- Directora di Departamento di Impuesto (DIMP) a tuma e palabra den conferencia di prensa di gobierno, hunto cu Minister di Finanzas Xiomara Maduro, pa loke ta e tema di BBO na Frontera.

Luenne Gomez-Pieters a cuminza bisando cu nan a sigui cu e sesionnan di informacion e siman aki, y tambe nan a tuma nota pa medio di Minister di Finanzas y Minister Presidente, di algun preocupacion cu gremionan tabata tin, ora cu nan a sinta cu Parlamento.

“Esaki ta algo cu nos a tuma di biaha na serio, y a bay den combersacion cu nos coleganan di e Departamento Legislativo y tambe cu e Fiscalistanan cu ta traha riba conceptonan di Ley.

Loke nos a bin ta ripara ta cu hopi biaha den e sesionnan, gremionan y sector priva tin nan reservanan, miedo of preguntanan ora ta trata e definicion di ‘handelsgoederen’. E concepto di ley ta bisa cu ‘handelsgoedern’ ta productonan cu ta destina pa rebenta. Den e memorie van toelichting, unda ta duna un tiki mas di splicacion di kico ta productonan cu por wordo re-bendi, tambe ta poni cu esaki no ta encera productonan cu ta wordo cambia di un forma of otro”, Gomez-Pieters a señala.

El a agrega cu esaki ta trece un tiki desbalanse den interpretacion y tambe preguntanan cu e gremionan ta bisa “kico di berdad por wordo deduci di e BBO cu nos ta paga na frontera”.

“Nos a sinta cu expertonan y coleganan di e Departamento di Legislacion, y nos por informa gremio y comunidad, cu e interpretacion, y tambe mirando e cuadro financiero cu ta mara na presupuesto di 2023 pa cu handelsgoederen, ta encera tur producto cu ta wordo importa cu e meta pa wordo re-bendi. Esaki ta pa mantene e simpleza tambe di e ehecucion di e BBO na frontera pero tambe di e derecho di deduccion.

“BBO paga na frontera di tur producto cu por wordo re-bendi ta 100% deducibel di e volumen di benta di e comerciante. Pa duna un ehemplo den practica, pa e supermercadonan e lo tin e siguiente aplicacion: e BBO paga na frontera pa un rol di keshi, por ehemplo, pero tambe e parti di dje cu ta keda corta na slides, den bloke, of cu ta pone species den dje ta keda deducible di e volumen di benta”, Asina Director di DIMP a pone un par di ehemplo mas. El a remarca cu e meta ta pa e producto wordo re-bendi y no pa e supermercado use pa su mesun consumo.

Gomez-Peters a remarca cu esaki ta conta solamente pa esnan cu ta importa producto y no pa comerciantenan cu ta cumpra di un 'wholesale' local, cu ta registra caba. E 'wholesale' ta esun cu tin derecho na deduccion.