Directora di DIMP a duna un charla tocante cambionan fiscal na miembronan di OPPA

Pa peticion di Ivo Valdes, presidente:

ORANJESTAD (AAN) — E Organizacion di Pensionadonan Publico di Aruba (OPPA), a acerca e directora di Departamento di Impuesto, señora Luenne Gomes-Pieters, pa duna e miembronan di OPPA un charla, tocante e cambionan fiscal y tambe e manera di yena e 'aangiftebiljet' di 2023.

            Presidente di OPPA, señor Ivo Valdes, den entrevista cu DIARIO a menciona, cu e interes ta grandi pasobra nan mester a parti’e den tres dia di charla, pero pa tur hende haya oportunidad di haci nan preguntanan, debidamente, y haya contesta cu por yud’e a limita e grupo na 40 pa 45 persona.

            Valdes a menciona cu e interes ta grandi pasobra cada bez, e miembronan ta acerca OPPA, pa yuda nan yena aangifte biljet, y OPPA tin un persona pero e ta haya hopi peticion.

            E aña aki OPPA tambe a pidi señora Gomes-Pieters  pa yuda nan cu e asunto aki, locual e ta evaluando. Ivo Valdes ta spera cu director di impuesto por yuda nan.

“Loke ta pasa ta cu nos miembronan no ta contento cu e forma cu DIMP ta trata nan. Nan ta haya cobranza atrasa y nan ta haya solamente 24 luna pa paga. Pero bo no ta haya un 'aanslag' so sino tres of cuater tras di otro. Ora bo coi e suma total pa paga den 24 luna, un hap grandi ta kita di nan entrada, y p’esey hopi di nan ta rabia. Mi ta kere ningun hende gusta ora ta haya un envelop di DIMP na cas”, Ivo Valdes a señala.

            Valdes a sigui bisa cu OPPA ta haciendo su best, y el a compronde cu tin un locket special pa nos grandinan, y den e sala el a tende e bon noticia cu nan ta dispuesto pa yuda e pensionadonan y e ta spera cu sigui asina.