Ya e ta den su ultimo fase:
ORANJESTAD (AAN) Den conferencia di prensa di Partido Movimento Electoral di Pueblo (MEP), e Presidente di Parlamento mr. Edgard Vrolijk, a hiba palabra.
Parlamentario Vrolijk a bisa cu e metanan cu e tin ainda pa termina, ta e independizacion di Parlamento.
“Nan ta hopi leu. E leynan ta Caba den DWJZ y nan tin cu bin bek, despues bay den man di Parlamentarionan tambe, pa vota”, Edgard Vrolijk a indica.
El a expresa cu tin biaha mester atende cu Parlamento pasobra nan ta bipolar tambe. “Di con mi ta bisa esey, pasobra ora nos a cambia e Constitucion nan mes a traha e ley, nan mes a cana e caminda, nan mes a ehecut’e y ora di vota, nan a vota contra. Mi kiermen, nos no por ta bon di cabes si aworaki nos ta den e mesun proceso. Den esaki tur a contribui na dje, tur a traha riba dje, y ban spera cu nan por aprob’e na final di dia. Hasta e ta bay Hulanda, Hulanda ta aprob’e y na final di dia, e ta keda akinan pa aprobacion”, Edgard Vrolijk a señala.
El a agrega cu naturalmente, e otro meta cu e tin ta pa bringa pa haci e sala di Parlamento, uno mas moderno. Esey ta e ultimo fase cu falta, pasobra e camaranan ta updated. Pero infrastructura ta malo. “Tin un parti di cushina cu ta traha den mi nervio, ora cu porta ta habri tur hende ta wak tur hende den cushina, y tambe tin un plan pa cambia esey den e proximo lunanan. Kiermen, tur e cosnan eynan mi kier termina den e ultimo fase, p’asina añadi na un totalidad di un plan. Kiermen, nos no ta traha pa loco, nos ta traha cu planificacion pa e cuater añanan”, Presidente di Parlamento Edgard Vrolijk a señala.
